放大假

自從四川地震之後，個天就係咁落雨，係咁落，就連我一年一度o既大假都唔放過，究竟個天仲要喊幾耐架?! 不過又唔可以怪晒個天令到我個大假落雨，要怪就怪我老豆啦，因為我老豆係一個"雨男"!

記得細個嗰陣我成日都要香港同澳門來來回回，因為我老豆有一段時間响香港返工，平時多數都係亞媽同我哋兩姊妹過香港，都無乜問題，但係如果同我老豆一齊........唔落大雨都唔方好天；由呢D經驗話我知，我同我老豆出門就一定會落雨，應該係話就算佢自己一個出門，個結果都係會落雨，我一早就做好心理準備。

放大假就係去香港，第一站廸士尼，book咗一晚酒店，(請注意，嗰日係黃色暴雨警告)第一日玩到旁晚就落大雨，咁都好，好過玩到一半先無得玩，仲好好彩咁有得睇煙花；第二日再入番去玩，嗰個遊船河都幾好玩，不過我家姐個女就嚇到差D喊。

第三日去咗海洋公園，真係由朝玩到晚，又係好好彩咁，我哋睇完海洋劇場先至落雨，今次呢個劇場都唔錯，因為有八條海豚表演，我上年去睇都係得三條，嗰五條新成員雖然表演得麻麻，但係都好精彩。

第四日中午就返澳門啦，(請注意，澳門黑色暴雨警告)個假期咁就玩咗大半，其他時間我都係响屋企，不過有假放就已經覺得好好，又要等一年先再有大假放啦。