我得左啦！ 真係開心到震！！

新鮮滾熱辣，忍唔住要同大家分享我嘅喜悅，我今日考到車牌啦！ 重要係一take pass，勁開心呀！！ Yeah~

其實一路都諗住去學車，算係我其中一個小小嘅願望，最終三月尾的起心肝報「香x駕駛學院」學棍波輕型貨車，其實學私家車同輕型貨車都係一樣價錢，咁梗係揀學輕型貨車啦！ 考到就有兩個牌嘛！ 同埋我想學一啲自己完全唔識嘅野，自動波就真係簡單左啲，而且睇下自己能力去到邊都好！ 雖然佢比出面其他駕駛學院貴，但佢開頭係場內學習，比較穩陣啲，唔使一開波就揸出街，啲行人唔驚我自己都驚！ 二來聽聞佢啲導師質素都有番咁上下，唔係良莠不齊，咁都叫有啲保證，三來近我住o個頭嘛！

重有我係揀綜合課程，一次過考合併試，唔使考中期試先到路試，諗住係驚都係驚一次啫！ 我更加冇join佢勁sell我嘅「智尊」課程，即係全個課程跟同一個導師、用同一部車，我覺得每堂跟唔同導師都冇壞，起碼唔同人有唔同嘅教法，咪等自己吸收唔同人嘅方法、再搵個o岩自己嘅用囉！ 我係咁諗o架！ 所以佢有sell我轉「智尊」，我都冇理

就係咁，19/4開始第一堂，唔係講笑，由最初連「極力子」都唔知係乜，到而家可以冇死火、 算係識得點樣操作架車，自己諗番個過程都覺得好得意，我永遠都會記得我學車時所遇過嘅野....

一次係三號風球+紅雨、另一次係黑雨情況之下學；另外頭一兩次行最甘嘅考試路線「宏業東」 - 出名最多貨櫃車、路兩邊泊滿死車，真係好驚！ 完全唔識點去處理，扒頭出又驚迎面啲貨櫃o黎，不過後未都克服到....重有好多好多.....

好似講左咁耐，都未講今日考試點....考之前真係驚，我一緊張就會肚痛，一肚痛就要去，去左兩次呀！ 後未同自己講：「平常心，咪好似平時學車咁揸，當個考官唔o係隔離咪得囉！ 死就死啦....」

我考9: 15a m，等左一陣個考官就o黎，原來係個阿伯，咁我都好有禮貌叫聲阿SIR早晨，但佢冇彩我，我都預左，考牌官出名cool！ 佢跟住就叫我去3號位泊車，泊得都ok啦，佢落都冇落車睇就叫我去做調頭，Yeah~過左一關！ 做埋調頭之後就準備上斜停車、開車，到我搞惦哂之後佢就話去「元朗邨」啦！ Yeah~過哂三關啦！

去「元朗邨」？ 我真係咁好彩？呢條路算係易揸同冇乜trap，我一邊同阿sir講：「係！」 一邊心裡，我成功在望啦！

路面唔算太多車，當然係有貨櫃車，但比我想像中少車，一路都好暢順，我越揸越有信心，心諗應該pass卦？！ 返到學院睇下個錶，吓~9: 35a m？ 20分鐘就考完啦？咁快嘅？

個結果係我乙部同丙部都合格，一take pass呀！！ 超開心！ 我重男友、家人同朋友分享我嘅喜悅，而家個心情都重未平復呢！