五日四夜分娩沙沙妹---第四篇之陪產

唔知大家睇完生產篇有無比我嚇親係真人真事，無花無假~~~

其實係我未生之前有問過爵士會唔會陪產，當時佢話會，但其實我個心一直好矛盾因為有好多人話陪產後可能會有好多問題，同埋我都唔知陪產後爵士會點唸所以.........之前醫院係要丈夫上分娩的一課先可以陪，後期就唔需上課都可以陪產，只要產房當日許可就得。因為咁我地就無再講此話題住，但到左我入院時我又再問爵士佢都話陪，護士幫我檢查時都有再問爵士，佢都一口答應，跟手就比左D圖同文字佢睇過生產過程係點，但佢都未睇晒又比護士叫佢係出面等。

到我生完沙沙妹後，好朋友Anna來探我佢靜靜話我知爵士真係好好，因為佢話比Anna知見我生既時候咁痛，佢真係唔忍心再叫我生多過。個刻聽完我都好感動，雖然佢陪產時只可以企係我耳邊附近唔會睇到我點痾沙沙出來，但都感受到我既痛楚連自己都痛。生完爵士都無講過我知佢睇到聽到d咩，我亦痛到無心情問佢。

等我好d時佢先話我知，佢睇到護士係我痾最後一次時，拿住把剪刀一下就剪落去唔知邊到，咁沙沙妹就出左來了。聽完佢咁講都好驚就係呢一刻佢真係令佢一世難忘。

當陪完產，起初都好擔心唔知爵士點唸雖然我覺得佢唔同左，但一直都唔敢問佢。(佢比以前係對我細心左)到出院返到屋企我就忍唔住問佢，因為由我生完到出院佢既態度係好唔同，係對你好無微不至佢答我見到你生個刻真係好深深感受到你的痛苦，就算係你身旁又做唔到d咩，真係好心痛所以佢同自己講等我生完後要比以前更愛錫我同沙沙聽完真係感動c了~~~

所以我想同大家講，原來老公陪產係一件好事，所以各大肚朋友如可以都盡量請老公陪產，生既時候有人安慰，生完又比以前更好。(不過都有護士話有d陪完產有反效果)

比住幾張前日既沙沙妹大家睇住先啦!!!

**講過秘密比大家知呀，係我出院第2日，爵士SEND SMS話我知，原來當日佢陪產時，佢自己睇到我生得咁痛，佢都眼濕濕呀!!你話幾感動