按摩

                一路以來對按摩都有D抗拒,但因為右邊臀部同大腿肌肉不時有酸痛嘅感覺,所以想試吓按摩可唔可以幫到手,於是上星期六約小鳳帶我去sam chun按摩,囡囡Candy聽到我去按摩佢又話去,咁梗係唔可以賴低老婆喇,於是一家三口約小鳳伉儷晨早响九龍塘等,一齊坐巴士經沙頭角入深圳。

                去到沙頭角邊防,照例又被拘留問一輪,今次重成十幾分鐘tim,最後要攞埋張'和輪卡'出嚟先比我過關,真係氣死!

                過關後,小鳳話去試間新場,我哋當然無異議,由專車車到一間叫'海泉灣'嘅桑拿浴室,個場好大亦算新,按兩粒鐘都係78蚊人仔,又包自助午餐,認真抵。按完又真係好似鬆咗。

                做完按摩,又由小鳳帶去金沙酒樓食晚飯,我哋叫咗半隻土雞,芋頭南瓜㷛,招牌炒飯,粉絲海鮮㷛,蝦子豆腐㷛,通菜炒牛肉,埋單都係218蚊人仔,超抵食。食飽飯行咗一陣,見無乜好睇就番香港,番到屋企都成9點幾。

多謝小鳳做領隊!