盈盈@16個月大

眨下眼，盈盈小姐已經16個月大了！這個歲數，正是最好玩的階段，而且已經不再BB，而係一個真真正正的小朋友了！她有自己的思想，有自己的意見（而且仲好鬼多意見），識得去要求，識得去揀，更加識得扮野！戲子的天性，始終無變過！

盈盈好識得睇人眉頭眼額，亦好識得搵人來蝦，對住公公就特別惡死，但得番佢同公公兩個時，就會勁tum公公，又嗲公公，總之就係一名古惑妹！有時盈盈自己唔小心撞親少少，明明好細力，好明顯係唔痛的，但佢又會扮可憐，扁哂咀咁走來你身邊，指住自己個「傷患處」，然後扮喊，扮慘，其實就係想人tum下佢，錫啖佢！超古惑！有時佢見人多，就會作怪，特別鐘意扭計，一大聲少少話下佢，就即刻扁咀扮喊，明明平日就係好奀皮的，但一見人多就扮野！完完全全係一名戲子！

盈盈又好鐘意整蠱人，成日撩是鬥非，走去撩人玩，但人地一同佢玩，佢就即刻好古惑咁笑哂走左去，仲要係雞咁腳走左去，引人去捉佢！總之就係超爛玩！有時佢明明好鬼眼瞓，但一有得玩，就點都要死撐，不停咁玩玩玩，爛玩到不得了！

呢位小姐亦愈來愈多意見，成日指東指西，連我地坐邊個位，佢都要話事！食飯時，一見有人放低左筷子，就即刻指住哂，再講一堆外星話，目的就係要你拿起筷子，唔准放低，到你攞起左筷子，佢又會指住某碟餸，然後講「夾」，要我地去夾！有時俾ｄ餸佢食下，俾條菜佢，佢又多多要求，指住碟魚勁講「魚魚」，要我地夾魚，到食得咁上下魚時，又指下第二樣餸，有時又要「湯湯」，真係俾佢點到暈！

近日盈盈仲好似覺得自己好大個女咁，搭火車又要自己坐一個位，坐船又要自己一個位，唔肯坐我地大脾，就連我地在家食飯，佢平日明明係坐自己張餐椅，而家佢竟然唔肯，要我地俾一張凳佢坐！佢坐完之後就會好滿足！真係俾佢笑鬼死！

至於學習方面，其實而家呢個年紀，簡直就係「複製人」，不斷咁copy我地的動作及說話，人講咩佢又講咩，人做咩佢又做咩！雖然佢有時講得唔係好準確，但已經feel到佢好努力咁學習～整體來說，都算唔錯啦！我又唔駛佢特別叻過人，只要佢在適當年齡，學曉應該會學識的東西便可以了～

基本上，而家盈盈識得講既野，除左媽媽、爸爸、公公、婆婆、爺爺、嫲嫲、姨姨、伯伯、叔叔、父父（舅父）等人物稱謂之外，亦識得講早晨、唔該、sorry、yes sir、拜拜、知、係、得、好、唔好、無、樹樹、花花、雀雀、車車、Thank you、乖、打打、Yeah、痛痛、熱熱.......等，其實仲有好多，一時間都寫唔哂！其實，都算ok了，已經足夠讓佢表達自己！可以溝通到～繼續努力吧！

至於其他學習，盈盈近日最大進步係學會自己穿拖鞋，及可以自己穿隻腳入對boot入面，仲學識左摺手巾（不過當然摺到好核突）！盈盈仲識得「玩太極」，相信係因為成日睇住婆婆耍太極，尤其係太極扇，所以盈盈都識得拿住把扇，好有功架咁起腳，個姿態都真係唔錯架～

不過我最滿意的，係盈盈長大左，有禮貌左，見到人會同人打招呼，去飲茶時有侍應斟茶，佢就會雙手合手咁同人講唔該，答應左我地的東西，大部分時間都可以做到（除非扭眼瞓），離開一個地方時，又會主動咁同大家講BYE BYE！其實，盈盈小姐雖然都係惡妹一名，但大部分時間，都尚算聽話的！盈盈，要keep住呀！唔好突然變番野蠻妹呀！

盈盈契媽送左一隻大BEAR俾盈盈啊!

盈盈平在家,就係咁樣不斷搞搞陣,走來走去,無時停的!

戴住聖誕帽的盈盈,有點似戴睡帽....

唔知點解, 盈盈好鐘意玩橙....

剛睡醒的盈盈小姐~D頭髮亂哂~

奀皮妹盈盈~

盈盈好鐘意睇街頭的跳舞表現, 睇到唔肯走~仲拍哂手掌~

頭髮愈來愈長了....有點似戴了假髮~ WAKAKAKAKKAKAKA~

某天去了朋友在珀麗灣的Club house, 超大超靚, 盈盈坐般的途中,已經滿有期待~