盈盈喉嚨發炎, 好陰公呀!

2009年11月1日（星期日)，本來約好一班0809媽媽一齊去食Tea，點知臨出門口時，發現盈盈身體發滾，探一探耳，體溫38.2度！第一時間當然係搵下邊度有醫生睇啦，仲邊有心情去食Tea！

可惜星期日下午，好多醫生都唔應診，我地又唔想帶盈盈去急症室喎，即使是私家醫院都要等起碼一個鐘，盈盈咁細個，又戴唔到口罩，在醫院呢ｄ病菌集中地，到時真係無病變有病.....終於幾經辛苦，搵到幾個應診的醫生，其中一個仲係兒科專科，咁唔駛諗，當然去睇呢位專科醫生啦，諗住應該勁ｄ呀嘛！

點知呢位專科醫生睇完盈盈之後，話盈盈喉嚨有少少紅，好輕微，兼且有少少傷風，仲話其實病情好輕，唔駛食藥都得......咁我地見盈盈除了體溫高之外，一樣好食得，而且仍然好活潑，咪信以為真囉，但為左穩陣起見，我地都一樣照俾藥佢食......食完一次藥，體溫只係稍為下降了少少，由38.2變成37.9左右，依然係微燒，點知再食第二次藥之後，盈盈就變成高燒，愈燒愈高！！呢ｄ究竟係咩藥來架？？？！！！！

盈盈亦開始精神萎靡，無哂活力.....亦都因為d藥太難食，盈盈食完藥仍然喊哂口，好淒涼，大大滴眼淚，真係睇見都心痛！之後佢食完奶奶便睡了，但整晚也睡得不好，不停驚醒，我地keep住幫佢探熱，發現佢的體溫忽高忽低，但始終都係有燒，凌晨三點幾，仲一度燒到39.4度（即差不多華氏103度），真係擔心死我地！當時諗，好唔好帶佢去睇私家醫院睇急症，但適逢當晚天氣開始轉涼，我地又怕凍親佢，又或者在醫院等候期間，盈盈呢刻抵抗力咁弱，可能會染左其他病，同老公研究左一陣，最後決定俾退燒藥佢食，等佢體溫可以稍降少少先，等到第二朝，即刻帶佢睇番之前睇開的家庭醫生－－關醫生！

第二朝起身，盈盈仍然發燒38.9左右，我同老公都請左假，一齊帶佢睇關醫生，關醫生一睇完盈盈喉，就話盈盈喉嚨好紅，喉嚨發炎，仲要係幾嚴重咁，所以在得到我地同意之後，佢就建議開抗生素俾盈盈，雖然小朋友不宜吃太多抗生素，但如果關醫生都認為有需要，咁我地梗係say yes啦！最緊要係快ｄ醫好我個寶貝囡！關醫生仲話之前個醫生開的藥太輕，完全殺唔到菌，所以喉嚨一日唔好，都好難退燒......

盈盈食完藥之後，果然退左燒，不過佢一見到ｄ藥就勁拍自己心口（表示驚驚），喊哂咁拼命退走，真係好陰公呀！盈盈，媽媽唔係想迫你食苦藥，但你病病呀，一定要食藥先可以好番架！睇見你咁淒涼，媽媽同爸爸其實真係好心痛！

食左一日藥，盈盈又變番一個活潑小朋友，雖然對眼仔都係一副病樣，但佢已經可以繼續搗蛋，繼續百百厭厭～至於發燒情況，其實都係發下退下，不過即使係發燒，都係微燒，咁已經好好多了～

不過......食左兩日藥之後，唔知係咪因為西藥比較燥，盈盈條脷仔生左一粒飛滋，好可憐呀！連平日佢最愛的水水，佢都無心機飲，不停話要飲水，但一飲就即刻痛到流哂眼淚，但又唔捨得俾番支水水我地.....食奶咀又係咁，明明好眼瞓，一放奶咀入口就喊哂，但又好想食喎，真係睇見都覺得佢好可憐，又要食藥，又生飛滋，明明好想飲水水食奶咀，但又因為痛而無哂心機....

11月4日（星期三），盈盈仍然係燒下退下，有時仲會燒到38度幾添....仲痛到連粥粥都唔肯食，水都唔肯點飲....D藥都就快食哂了，點解仲未好番呢？於是，我放工即刻返去同盈盈再睇多次醫生，關醫生一睇佢個口腔，就話佢個喉嚨仍然好紅好腫，條脷仔同個口腔都生左好多白點（即係飛滋），仲話佢隻菌太勁，真係要轉一隻勁Ｄ的抗生素，如果唔係好難好番，同埋盈盈會好辛苦.....無辦法啦，而家最重要係快D醫好佢！

在盈盈病的期間，我真係好心痛呀！盈盈出世以來，都未試過每日都喊得咁淒涼，就算佢初生時，都只係扭眼瞓扭肚餓先會大喊，點都唔會好似而家咁，日日都大喊，仲次次都好淒涼，大大滴眼淚咁湧出來.....真係睇見都肉赤，但最慘係，我地咩都做唔到，無論我點抱佢點錫佢，佢個口同喉嚨都係仍然會痛！試諗下，若果我地大人，個口生哂飛滋，都會痛到飛起，更何況一個只得13個月大的小朋友呢！每晚睇住佢睡覺時，緊閉著雙眼，但不停咁喊，左扭右扭，握實個奶咀又丟又執，好似好辛苦咁既樣，瞓瞓下都病醒，真係好陰公....但我地又真係愛莫能助，好心酸呢......

盈盈，你要加油呀！快ｄ好番，好番之後就唔駛再食藥藥，可以繼續飲你最愛的水水了～加油呀！