大肚婆的好處～

可能因為已到了懷孕尾聲，所以我近日成日都在懷緬大肚的日子，諗諗下，雖然腹大便便係好辛苦，但其實大肚婆都有好多優待喎！

自從有左BB之後，原本已經錫自己既老公，就變得更加體貼，樣樣呵護備至，平日唔做家務既佢，變得主動處理家務，又洗衫，又吸地，又抹地，又換床單......等！自己就好似公主咁，咩都唔駛煩（雖然要煮飯），老公仲成打電話來問下我情況添～

約家人及朋友食飯，大家又會好體貼我，會揀一些近我既地方共聚！無論我同咩人出街，每次去廁所，都會有人主動陪伴，驚腹大便便既我被人撞親又或者自己跣親，雖然好多時候，我覺得自己一個人行出行入都無問題，但見到親朋戚友對自己的關懷，其實又真係幾窩心架！

而每次覆診，又一定會有人陪住我，如果老公請唔到假，媽媽及奶奶知道後，就會陪我前行！佢地仲會不時買些好野我食，又花膠又生果，又會陪我飲茶～媽媽因為住得近，仲會得閒煲些好湯我飲！爸爸又會得閒過來幫我整下間屋，例如在露台安裝一個防雨檔，有時佢見我大住個肚走去洗涮浴缸，仲會主動幫我間屋進行大清洗添～

仲有呀，身邊唔少好友一知我有左之後，又夾錢買禮物俾BB，又成日打來問候我同BB情況，就連外國的親戚朋友，都會打來或電郵關心我，都真係幾warm架！至於出街，好多時都有人讓座俾我，不過只限於坐地鐵火車，巴士就通常無人讓座....但都好過無呀！起碼都仲見到唔少有心又有教養既人！

其實大肚之後，仲有好多好多好處架！例如唔駛再叫自己keep fit，因為根本無得我keep，懷孕係大條道理去肥架嘛，況且，就算我食少d，都係一樣會發福架啦！所以唔理了，生完先再算！

仲有喎，以前食飽左，好驚自己個肚腩或胃腩現形，而家就真係食幾多，都無人發現我飽唔飽，哈哈哈哈哈！因為個肚點都係咁脹～

所以話呢，大肚真係幾多好處架！不過，我好快就要打回原形，而家已經踏入37週，我真係要好好享受埋餘下既大肚日子先得！