告別「全職媽媽」的生活....

過埋今日(2009年8月23日)，我便正式告別「全職媽媽」的生活了！心情真係好矛盾......究竟這是否一件好事呢？究竟「得」的多，還是「失」的多？

其實有時諗諗下，我都已經好幸運，由懷孕到生BB，到而家盈盈差不多一歲了，我由全職主婦變為「全職孕婦」，再成為全職媽媽，日日夜夜陪住盈盈成長，見證了她每一個新發現，每一個新進展，我真的已經好幸福！在今時今日的香港地，以我們這個「財力」，能夠容許我「偷懶」兩年，真係已經好難得！

不過，有時睇見老公咁辛苦揹起成頭家，我真係有點心痛.....同一份薪金，以前他一個人搵一個人用，而家就一個人搵一個家用....仲要係一家三口一齊瓜分佢份糧！但佢從來都無抱怨過，任由我在家安胎及湊女.....試問，我又點忍心！

無可否認，我出來工作的話，屋企的資金會流動好多，老公的擔子都減輕不才，所以由盈盈半歲開始，我已經成日諗：「我係咪應該出來做野呢？」加上身邊的親朋戚友都會同我講：「讀咁多書，唔做野好晒！」但老實講，其實我對工作係無野心，事業同家庭，我會亳不考慮地將家庭放在首位！再講，就算我讀幾多書，我都唔認為在家湊女係一件可惜的事喎！因為知識是一世的，搶不走的，而且我仲可以將我的知識，教導下一代呢！

又有人同我講：「咁後生，做煮飯婆，會脫節架！」但我又覺得，我地呢一代的全職媽媽（又或者全職主婦），其實好難脫節，因為我地有互聯網，只要你願意，你都可以好update！況且，我從來都唔係一個好追得上時代節奏的人！哈哈，所以，根本呢個都唔會係我考慮返工的因素！

重出江湖，完全都係為左個家，為左減輕老公的壓力，也為左我的父母！因為我的父母近日都失業，以他們的年紀，要再搵返佢地專業的工作，實在有少少天方夜譚！其實我父母一直都好體諒我地，知我無野做，又要養阿囡，由我退出職場開始，就容許我唔俾家用，我真係好幸福！不過而家佢地無收入了，我絕不能當無事發生，亦唔想再加重我老公的經濟負擔，若果我再唔做野，咁老公就要一份糧養5個人！實在太可憐了......

不過，當我重返職場後，我便不能無時無刻陪著盈盈，見證她每一個成長片段，亦唔可能好似現在咁，每刻都親力親為咁教導盈盈......咁究竟係「得」多？還是「失」多？

盈盈，希望你唔好怪媽媽咁忍心，在你最需要我、最痴我的時候，突然走左去返工，為左爸爸，也為了公公婆婆，你都要同媽媽一齊努力，要乖乖地，每天等媽媽放工接你，媽媽一定會更珍惜同你相處的每一刻！