全家都病哂!

之前一直都無時間update個blog，皆因我地一家三口都病哂！首先發病的，係我老公，佢喉嚨痛，有感冒徵狀，同日，盈盈亦開始個身慶慶地，好似想發燒咁，翌日就傷風流鼻水，仲咳添！當時我仲未受到傳染，但忙於照顧家中一大一小，都已經令我忙到頭都大埋！

而盈盈因為鼻塞的緣故，睡又睡不好，加上佢又要啜奶咀睡覺，一啜奶咀，個口就無法用來抖氣，咁就喊哂口，但唔俾奶咀佢，佢又喊喎！一晚真係醒好多次！搞到我都無覺好瞓！

到老公同盈盈的病情都漸見穩定，就輪到我病，喉嚨開始痛，為免病情嚴重，已經即刻去睇醫生，點知都係無用，食左兩日藥，終於大爆發，喉嚨發炎不得止，仲要扁桃腺都發炎，連吞口水都痛到標眼淚，醫生仲話，扁桃腺發炎係比較難好的，要慢慢來......但盈盈同老公又未完全好番喎！真係屋漏偏逢連夜雨！！

終於病足一星期，一家大細才算係好番！呢段「同病相憐」的日子，真係辛苦到人都癲！！希望以後大家都身體健康，無咩病痛啦！

病到傻傻地......

睇見盈盈一副病樣, 真係心都痛埋!