盈盈兩個半月大了～

小朋友既成長真係好快，唔經唔覺盈盈已經兩個半月啦！諗返佢初出世時，大髀同腳瓜一樣咁幼，細細粒，成舊粉團咁，雖然當時既佢都好健康，但作為母親，睇見佢咁瘦弱，真係有點心痛，記得個陣我成日都諗，早知最後都係要開刀，我就臨尾谷肥Ｄ佢啦！

不過，時間過得好快，眨下眼佢已經大個左好多，雖然佢都唔係肥嘟嘟、肉騰騰個種BB，但就絕對合乎標準，無過輕無過重，而大髀仔都多左好多肉仔，臉仔都脹卜卜，成個人仲長左好多添，好多初出世時衣不稱身既衫仔，現在都變成吊腳褲lu......

盈盈亦由初初既粉團BB，變成好有力既小朋友！佢而家唔鐘意人地打撗抱佢，鐘意打直抱，而且個頭仔仲成日抬起，兩頭擰，好似食左搖頭丸咁，有時仲會搖過不停！腳仔亦愈踢愈高，愈踢愈有力，有時被佢伸一腳都真係會痛架！

佢仲好鐘意玩趴趴，有時自己會扭哂腰，企圖轉身，當然係唔成功啦！而每次幫佢轉身後，趴向度既佢就會表現得好開心，雙腳係咁爬，好似游水咁款，個樣仲要好緊張咁，真係好搞笑！有次佢仲成功由趴向度，轉身變成瞓向度，成功轉身既佢仲好似好得戚咁添～

而家既佢亦愈來愈古惑，有次佢自己玩得好開心，突然放左一個屁屁，即刻自己靜哂，眼仔係咁周圍碌，個樣勁鬼祟，好似係度扮唔係自己放屁咁，又或者係睇下有無人發現佢放左個屁屁咁，真係笑死我同老公～

盈盈出左世兩個半月，已經搞到我同老公咁窩心，唔怪得人地成日話，就算湊仔有幾辛苦，返工有幾辛苦，只要見到自己既仔女生活得開心，就真係可以咩煩惱都唔記得哂啦～～

你睇佢趴得幾肉緊！


盈盈個頭仔可以抬到好高啦～

任何時候都想轉身！

扭哂成條腰！！！

盈盈仲好鐘意講電話，一見講電話，就會眼定定咁望住你，然後露出一個好期待既眼神！

兩隻手仔間唔中可以互相捉住啦！唔知幾時可以「請請」！