091025 小說《屬靈屬世》第60集

　　「唔係？如果唔係咁點解詠森最近無哂心機？唔同你拍拖不特止，連餸佢都唔學煮呀？我問佢點解最近唔學煮餸，佢就話即使點努力學都唔及人煮得咁好味。佢同你拍拖以來都未試過咁架！究竟你地兩個發生甚麼事呀？」文俊覺得很奇怪地回答：

　　「無發生甚麼事呀！只係星期一夜晚同佢鬧咗幾句之嘛！最近妳都知我要去睇市議會委員會聆訊啦！我都不知幾忙，連同Sylvia鬧交都無時間呀！邊度得閒追第二個女仔呀？」

　　伍母：「咁係唔係Sylvia對你有甚麼誤會呀？嗱文俊！伯母讀得書少，唔識得同你講甚麼道理。我只係知道詠林同詠森係我的命根，對我來講佢地唔開心仲慘過我自己唔開心。所以我唔該你嘞！無論用甚麼方法都好，唔該你氹番掂我個詠森嘞！」

　　俊：「得！無問題！包係我身上。」

　　到06年05月06日(星期六)早上，文俊回到公司之後第一件事便是致電Sylvia的姊姊Lancy，因為他知道Sylvia任何事情都會向姊姊傾訴。Lancy對文俊說：

　　「估唔到阿媽咁快搵你幫手喎！唔怪之得阿爸叫佢唔使咁緊張啦！」

　　俊：「咁妳即係知道發生甚麼事啦！唔該妳幫幫忙話畀我知啦！」

　　林：「唔好意思喎！細妹叫我唔好話畀妳知喎！」

　　俊：「唔該妳幫幫忙啦！妳都唔想妳個妹成日唔開心架！」

　　林：「我都好想幫妳呀！但係我成世人得一個妹，唔通你想佢同我反面咩？」

　　俊：「咁妳叫我點呀？我都唔知點解妳個妹咁驚SUKI會撬佢牆腳。」

　　林：「咁你點解要問我呢？」文俊意會到Lancy這句說話的含意，於是問：

　　「妳意思係叫我……」文俊還未說完，Lancy已經搶著說：

　　林：「嗱！我甚麼都無講過呀！你唔好冤枉我呀！」

　　俊：「得！放心！我唔會冤枉妳，我知點做嘞！」

　　文俊即時致電聯絡SUKI，將詳細情況告訴她知道。她聽見後很驚奇地問：

　　「吓！唔係嘛！Sylvia點會仲誤會我地架？」

　　俊：「所以咪要搵妳囉！個晚妳係女廁同佢講過甚麼呀？」

　　德：「無呀！只係讚你係一位好弟兄，叫佢要好好珍惜你囉！」

　　俊：「除咗這些說話之外呢？仲有無呀？」

　　德：「無啦！我已經同佢講我同你永遠都只係主內肢體關係架嘞！」

　　俊：「無理由架！應該同妳有關架！妳再唸唸個晚係女廁發生甚麼事！」

　　德：「個晚我入到去叫佢幫我看住手袋，我入廁格。出來之後佢同我講對唔住，因為頭先唔小心整跌個手袋。咪住！我明白喇！個手袋呀！」

　　俊：「手袋？我好似無送過手袋畀妳喎！點解Sylvia會因為個手袋誤會我地架？」

　　德：「依家唔方便解釋畀你知住，你可唔可以畀Sylvia手提電話我呀？」

　　俊：「妳想點呀？妳唔好亂來喎！」

　　德：「你同我定啦！我知道點樣同你搞掂佢，你信我啦！」

　　於是文俊將Sylvia的手提電話號碼告訴SUKI知道，SUKI即時致電Sylvia邀約她星期日( 05月07日 )崇拜後一起吃午餐。這邊箱，文俊中午放工後返教會團契，可是他不見Sylvia。文俊致電嘗試聯絡Sylvia，可是轉接到留言信箱。

　　到晚上文俊嘗試再致電聯絡Sylvia，可是她不在家裡。文俊致電Sylvia的手提電話，卻再次轉接到留言信箱。這時秘密天使ANGEL上互聯網，以下是雙方的文字記錄：

　　使：「你知不知道有傳媒已經得到你和嚴牧師的對話錄音檔案？」

　　俊：「今天早上看報紙時知道。」

　　使：「咁你有甚麼打算？報紙和週刊可能會藉此大做文章喎！」

　　俊：「我打算見步行步。一方面我不知道他們會怎樣大做文章，另方面從現時環境和錄音內容來看，對我都是有利，所以我不需要太擔心。」

　　使：「咁又係，依家應該擔心的反而係嚴長老。今日教會裡已經有人議論依件事，睇怕如果嚴長老唔出來解釋，金華哥同嚴長老都會好麻煩。」

　　俊：「所以現在嚴牧師需要應付的事情越來越多。如果他再不肯承認錯誤，我相信他真的很難平平安安等退休！」

　　使：「不過我驚嚴長老到時又會用諸多理由掩飾，加上佢係TPPEC的地位和影響力。我相信如果佢死撐，你都未必有佢符，除非……」

　　俊：「除非怎樣？」

～待續