升官發財死老婆

　　早排有個伙記老婆上吊自殺。臨行前將個親生兒子整死。雖然個仔一開頭仲有氣，但第二日都去埋。

　　啲同事第一個反應係隨口UP：升官發財死老婆！（呢句係古代流傳落嚟，為古代男人人生三大快事！）

　　作為一個女人，我真係想鬧爆呢個女人，雖然佢好慘，老公溝第二條女，想死都無可厚非，但所謂虎毒不吃兒，竟然自己親手殺咗個仔要個仔陪葬，有乜謂？香港大把男人劈腿啦，如果做女人下下都要死都唔知要死幾多次至得！我諗香港著緊有二份一女人要死！（係男人都多心啦！身邊又要拖一件，開心時又要一件，間唔中又偷下食......）

　　某日經過電器鋪，見到好多部高清電視，剛剛做緊個財經節目係由陳慧儀做主持。佢當年離婚後都無放棄到自己，又拖住兩個小朋友，而家工作算係有成，都唔錯啦，如果佢當年死鬼咗，又會唔會有今日的成就？

　　再者，查實個女人先至得嗰三十一歲，好可能仲有好多好機會呢，再唔係，咪俾心機湊大個仔囉。

　　不過而家無得好講啦，佢都咁揀囉......

P.S.其實我覺得個女人咁死，對佢老公的影響唔會好大，雖然目前佢老公應該好傷心，但時間可以沖淡一切，一年半載就自不然會無嘢啦！咁死就唔抵啦！隔多幾年佢老公咪一樣娶個第二個，兒女成群......佢同佢個仔就......唉！