書法班同學開年

約咗書法班同學往深圳開年，由深圳灣乘巴士往“南山文化中心”，大師兄推介嗰度嘅“大飽口福”食自助餐，假日$138，店子非常舒適而且勁大，呢個環境，呢種食物質素，喺香港就唔止呢個價，食物真係幾好，仲非常多選擇添，竟然連羌醋、燒味都有，但我始終唔敢試生蠔，十一點半開始，到咗點半己經大半飽，但為等人坐到三點，原本想出去周圍行吓，但點知要出示出外券，而出外券要埋咗單至有，仲要出咗去冇得返入嚟，變成後半段時間喺度呆坐，得閒又唯有喺店內周圍行、又再食吓生果咁，相信呢種防止食霸王餐嘅方式只有大陸至有。

同香港不遑多讓嘅商場，連溜冰場都有。

飽食之後行約十分鐘去書城，買咗兩本畫冊一本字帖，但就搵唔到想買嘅“鄧石如篆書千字文”同“房弘毅”楷書字帖，書城勁多人，行咗一個鐘就分乘兩部的士到“世界之窗”坐地鐵到“福民”，小雙要攞裱咗嘅字畫，我就順便買筆，又訂造咗一個閒章，時間已晚，天已黑齊，但大家仲未餓，晚飯都冇食就起程回港，由福民到福田口岸只係一個地鐵站，一條直路，我哋揀咗用走的，行色匆匆咁又一日，除咗中午食自助餐時有得坐之外，全日就係行、行、行，鞋雖然已經有氣墊，但仍然行到腳板痛，今晚實好訓。