如果我唔滿意或唔喜歡某個人，
原因再簡單不過
就係佢性格有問題，
或者係冇品
星期六晚，又落咗 LKF
原本冇咩 mood
諗住食完個 dinner，飲兩杯嘢就走
但點知到最後，都係５點先返到屋企
入正題先
今日個 title 講嘅係男人
係我喺 LKF 玩過後所考慮嘅一個問題
此問題並無結論
我只想帶出自己感受而已
如有得罪之處，敬請見諒
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
係我自己多咗留意身邊嘅人
還是真係潮流帶動
發覺近年好多香港女仕身邊的男人係外國人
本人並無任何種族歧視
好奇心驅使下，有所疑問而已。
好多時候，都聽到香港女人話：港男呢樣唔好，嗰樣唔好
但係就認為外國男人較優秀，條件好
呢個現象尤見於 LKF
每次去到 LKF，都明顯留意得到，多數女人會將視線放於外國男人身上
即使有男人主動接近，或搭姍，都先審視其國藉
我絕對明白此現象的因由
因為從前迷失嘅我，都用同一個標準去審視佢哋
不過，越去得多 LKF 時，卻越質疑此標準
曾經同多名女朋友討論過呢個問題
外國男人真係特別好？
坦白講，以前嘅我，好認同外國男人特別好
物以罕為貴，更是虛榮
總覺得手拖住一個高大，帶著藍眼睛的男人
用出口成文的英語，跟他對答如流
旁人那種艷羨嘅目光
令自己不自覺堅固咗內心嘅虛榮
但係...
對宜家嘅我而言，反覆思量後，
認為男人係好定唔好
並不取決於國藉
但取決於人格
何解會有咁大轉變？
一、香港男人並唔係每個都賤
女人話，香港男人冇風度，唔開放，大男人，管三管四
我想為香港男人平反一下
冇風度！因為香港男人小家，斤斤計較，食餐飯都同你計
香港男人點會冇風度呀？
莫講話情侶
就算只係普通朋友，都唔介意請食飯喎
我身邊認識好多男性朋友都會咁做
當然，未必每個男人都會
但我想反問女人一個問題
既然係朋友，點解妳自己又唔主動請人呢？
呢個世界上，有邊一條法規講明男人要請女人食飯？
試問一下，當有個男人主動走嚟請食飯時，妳第一時間心諗邊一條問題？
我頗肯定係呢一句：冇端端請食飯？會唔會對我有意思？想追我？
將心比己！妳自己都未必會主動請朋友食飯，點解要期望人哋請呢？
而且無事獻殷勤，非奸即盜
難道妳會以為每個男人都甘願承受這“美麗的誤會”？
我都曾經遇過一啲外國男人唔大方
甚至斤斤計較
即使係一杯嘢飲，都會同妳計
此乃性格問題，並不是法例規定男人要主動請客
唔開放，又大男人，管三管四
作為情侶，當個男朋友開放時
妳又擔心佢太開放，怕佢出去偷食
唔管，又懷疑佢唔愛妳
管妳，又話佢俾壓力妳
咁點先？個男人要做啲咩，先可以滿足妳？
須知每一個人都係個體
有自己不同嘅性格
即使有多合拍，又幾多共同興趣，大家嘅思想一定有所不同
冇人會百分百了解身邊人想點
甚至至親，父母都冇可能知道
更何況一個原本嘅陌路人？
外國男人或者表面看來開放
但有些都保守得可以嚇跑妳
我身邊就有認識的女性朋友，男朋友為外國人
卻要她報告行踪
見她衣著性感，會嘮叨一輪
他不至於要局限她行踪
但千訂萬囑，不可跟其他男人這樣哪樣
最好連話都不要說一句
外國男人都不一定開放，不一定寛鬆的喇！
二、香港男人鍾意偷食
女人話，香港男人好賤，見異思遷，又會偷食
唔好意思！我想講一句，呢個世界並非只有香港／亞洲男人先會偷食
邊個話外國男人唔會？
邊個話香港冇好男人？
我自己身邊，都有好多好男人
眼見好多朋友嘅男朋友都好好
有責感，敢於承擔
當然，我亦相信冇貓係唔食魚
就算再好嘅男人，都有機會做出偷食行為
或者，有人話，佢唔做，唔代表佢冇諗，可能冇機會啫！
我唔排除此可能性
不過，我並唔認為只有香港男人先會咁
唔講外國住嘅男人
太遠，而且我並唔認識佢哋
近啲，就講我喺香港認識嘅外國男人
我眼見好多都已經名草有主
有些甚至係已婚
佢哋依然會出去獵艷，出去偷食
有些可能賤格得封口不提自己的 status
女嘅唔問，佢哋唔會講
問？佢哋都未必會老實作答
皆因佢哋係尋開心
並非尋真愛
好些來港工作嘅外國人，會認為自己特別優越
更滿有自信，自覺自己條件比香港人優厚
加上香港女人對佢哋嘅傾慕，
造就佢哋玩得更放，更開懷
無他，此乃供求理論吧了
有求必有供，相反亦言
更何況，佢哋的開放態度
打從接近妳的一刻，已經定下一條不明文的遊戲規則啦！
佢哋唔係來港定居呀
係工作！
有合約年期的！
總有離開的一日！
妳要對佢有何要求？
跟妳認真？跟妳結婚嗎？
小姐，當佢要離開時，到下一個國家工作
那豈不是要跟妳離婚？
因為難保佢去其他地方，又會遇到另一位心儀的女人嘛！
雖然，我眼見好多來港工作的外國男人都如是
但係，我亦見過或聽過好多完滿的結局
外國男人都有忠心的
同時香港男人亦如是
結論係：我冇確定的標準答案
男人好與壞
並不取決於國藉
全基於他們的品格
所以，我上述所講的，都有正反兩面
因為，我永遠深信，凡事都有多角度及原因
而每個人都有不同性格及品行
我不會說所有，會有所保留
因為每件事，每種人都有例外
換句話說：
外國男人並不一定特別好囉！
願，每個人都能找到值得自己愛的另一半！
柏豪 2009-10-29 21:38
追星迷 2009-10-28 08:20
這麼好的部落格，以後看不到怎麼辦啊！！！