Blogmatesの行烏蛟騰 1

我諗我需要一段頗長時間先可以完成"Blogmatesの行烏蛟騰"系列。

九點幾會合幫主兩公婆，食埋早餐就去大埔墟搭20C小巴去烏蛟騰。好長龍，等好耐都無車黎，又話九點九有班車，騙人0既！

終站落車，會合晒其他blogmates團友，就出發喔！第一站﹕茅廁...哈哈哈。

大家完成晒後，就真真正正出發喇。

呢度可以食客家菜，雜誌同blogs都會講﹕一定要試！不過因為時間關係，我0地無試到...>_<"

行呢段路都有少少過五關X六障0架，第一關係呢度。今次好多狗狗團友呀，正當每人雞手鴨腳咁抱一隻一隻狗過水之際，金寶就以一下水上飄加飄移，好輕易咁過0左另一邊，好堅呀！

人0地金寶好安安靜靜同好灑脫咁過0左水，但我0地就丫丫丫同啊啊啊，成班V嘩鬼叫，嚇親0左金寶喇。攪到佢好緊張周圍撞，有兩三個團友中晒招，SEE！

成排氣根，好想影個靚角度，但唔曉。

路程四周有水有樹，好舒服，天氣又唔太凍又唔太熱，所以行得唔太辛苦。

另一景點﹕破舊的石屋。

屋外內長滿雜草，好健康呀。