給Diodio的回應

         喺呢度想介紹個朋友畀大家識,佢就係Diodio 喇,點解要介紹畀大家識?唔知呀,可能因為我唔係咁鍾恴佢啦,唔鍾意佢成日唔寫blog,所以介紹畀多啲人識,等你哋去炮轟佢個blog,畗佢寫多啲,哈哈,身為愛國人士,中國最拿手嘅人海戰術我點會唔識!
         好喇,講返正題,呢編其實係睇完呢個叫Diodio嘅阿水,有感而發,算係回應佢主題,算係自己借啲兒發下嘮叨,唔關事嘅,或者肚痛急屎嘅,可以唔睇.如果真係冇嘢做,又好得閒嘅,都可以唔睇.因為太長喇,所以唔回應,而開一編嚟寫.

         話說我都有個朋友,我以為佢係朋友嘅物體啦,我都借咗一大筆錢畀佢,起碼多過我捐去四川嗰啲啦.想唔想佢還?想呀,因為真係好多好多,但我估佢十年八年內都還唔到畀我,算啦,我同佢話過:"第日老時,諗起今日一份人工兩份使,會覺得今生冇白走過!"但我都仲係咁後生時,嗰時打電話畀佢,佢就居然話我打錯,cut咗我線!再打,電話有響過呀,但連續幾個月都冇人聽!連同我玩開啲同學,以前同佢有講有笑嗰啲打去搵佢,佢見來電顯示唔係我個電話,終於接通,佢都話係打錯!係呀,我想搞大佢呀,我想告上法庭,但欠對方一個住址,民政事務署介紹咗個義務律師畀我,叫我問下意見.於是我約咗個律師,律師睇完我啲資料,話表證成立,但冇佢嘅地址,冇用!唉,不得不承認,法律原意第一個原則係要等啲有錢人更方便搵更多錢;第二係要嚇到大部份好市民,如果你係嗰一小部份冇畀法律嚇倒嘅人,咁恭喜你,抵你發逹.當一個普通老百姓有需要幫助時,先會發現仲有好多功夫要做,結果你退一步,整個社會都會因而得到安寧!
         另一件事,我有個朋友,以前最好嘅朋友,後來我做車房時,覺得佢唔止唔當我係朋友,直頭冇當我係人咁尊重過!唉,算數,阿媽話好人要識幾個,壞人都要識幾個,於是保持一定嘅距離作溝通.而佢老婆呢?我都識嘅,佢哋拍拖之前,我覺得呢個女仔係世上極少數同我有說話講嘅女仔.後來佢哋戀愛啦,後來佢哋結婚啦,我記得當日我好衷心咁祝福佢哋,真係發於真心.之後同佢老婆間唔中喺msn度都有傾兩句.直至某日,我想畀張近間好有信心嘅一張相想畀佢睇,臨send畀佢之前,我問佢係邊個,我以為佢會答:"阿水囉,咩事咁問?"跟住我就會答:"密碼呢?""邊有密碼呀?""因為張相好靚,我要知你係邊個先send畀你!""玩嘢呀菜肉包!""哈哈,玩下啫......"之類咁啦,點知佢答:"我係你朋友囉,唔send算數."正當我就快send嗰時,佢講咗句:"我收工喇,byebye."再加多句:"另,我對你啲相冇興趣!"跟住off咗.之後我諗咗好耐,使唔使咁呀?哦,原來佢以為我想佢答我情人呀,舊情人呀之類嗰啲答案......我估係,因為我同佢的確曾經係有啲比好朋友更好!之後佢冇再同我講嘢,好耐好耐,好耐都冇理我.我都冇理佢喇,哥哥佢兩公婆都見過,哥哥走咗,我都冇同佢哋講,何必呢?既然你兩公婆成日都諗到我咁衰,我唔係小氣,而係冇乜必要話畀佢知,冇乜必要話畀佢哋知我私人嘅嘢,冇咩價值!