黃大仙顯靈

         昨天的報紙,三名被騙來港賣淫的少女,其中一人成功逃脫,由於在香港佢冇親戚冇朋友,唯有走入黃大仙廟,求黃大仙相救.於是黃大仙就派路人甲路過,並起疑心,再報警相助.結果警方成功破淫窟,拘捕一名男子並救回其他兩名少女!
         真係大快人心!你都埋話黃大仙唔靈!希望被救回之少女,日後可以忘記呢一段傷心往事並重新做人啦,仲有呀,啲嫖客......真係唔爆句粗口唔得,你班死嫖客,正一仆街冚家鏟,死咗當環保!
         ok,我今日唔係想講神佛,其實黄大仙係道教嘅,同我所信嘅佛教有好大出入,甚至理念大有不同;而且即使當年我相信菩薩對我行過神蹟,我叫人信佛嘅同時,都未曾同人講過.因為佛教信緣份,只要你肯向善,不必信佛都可以得到快樂,佛祖從來唔會逼人要信佢,要跟佢行,但求人人都可以做啲心安理得嘅事,老時回望這一生,冇咩事會令自己覺得後悔,覺得慚愧,咁佛祖及一眾佛呀菩薩呀等等神仙,都會為你祝福.
         咁我今日想講咩?事源.......好似都好耐之前喇,話說某日包包同珠海才女講起國內嘅民生,我話我唔鍾意毛澤東,因為佢推行多子多福及任由民化大革命失去理智,甚至失去道德都唔理,對於中國負面嘅影響唔係十百八年嘅事,影響到嘅時間,真係難以估計!誰知佢話呢個仲未算,佢極端嘅反迷信對中國嘅影響先至大!
         我初時都有啲O嘴,反迷信都唔啱?係呀,的確如此!
         我一向都唔會對人哋嘅宗教信仰有咩意見,即使有啲宗教我越係認識就越係討厭,甚至憎恨,例如有個男人嘅街上走過嚟同你講:"相信我啦朋友,信咗我嘅神,你會幸福;如果你唔信我同我嘅神,咁你就要去仆街,永不得反生!"唉,呢啲同警訊講嘅祈福黨有咩分別?但我唔會有咩行動去制止佢哋,因為我相信任何有正派信仰嘅人,本身都係好人,只係有啲人走火入魔啫.或者佢哋正服侍緊一啲虛構嘅偶像,為一啲越解釋越荒謬嘅所謂真理而辯護時,我也不會好似佢哋逼我信咁去同佢哋解釋,因為呢啲都係造化.
        ok,造化,冥冥之中注定嘅,但我都相信佢哋係好人,因為相信神,相信奇蹟嘅人,就好似相信有聖誕老人嘅小朋友咁,都偏向單純,內心唔會太複雜,起碼佢哋會相信報應,即使間唔中會做一兩件壞事,但都未至於十惡不赦嘅地步,至少佢哋仲會內疚,害咗某個人,佢哋會做另一件事去救另一個人.而毛澤東嘅極端反迷信思想同做法,使人不相信神,不相信報應!咁信乜?信曹操嗰句:寧可我負天下人,休教天下人負我!利益自己得到先最實際,久而久之,國人越來越多人已經唔當道德係一回事喇!
         最後講句,因果循環,做壞事嘅人必定要付上代價,正所謂惡有惡報,若然未報,只是時辰未到!

                        *呢編係講國內政治,而唔係講佛,所以被編入<<愛上伊甸園>>類別