揸兜馬拉蟲

         首先,我哋再重溫下呢首歌啦,張學友--等你等到我心痛.
         好多朋友都問我喺度等邊個......其實邊有啫,只係某日無意中畀我發現到呢首歌,聽落,諗起好多年前嘅某一個下午,一個天氣涼涼的下午.記得嗰一個下午,唔得係啱啱買呢隻CD返屋企嘅嗰日定係一個好普通嘅下午,放學返到屋企,但我記得,就咁一個人,瞓喺張牀上面,一路重複又重複呢一首歌,涼涼嘅氣溫加上昏暗嘅暮色,份外覺得悽美!就咁就聽足一個下午,差唔多有三個鐘頭都係同一首歌.

deng ni deng dao wo xin tong - zhang xue you

 

 

 

 

         上一編問我等邊個嘅留言,我就唔逐一回應喇,因為我都唔知去邊度作一個我等嘅人畀大家!好喇,講返正題,啱啱過咗嘅嗰個星期日,係一年一度嘅揸兜馬拉蟲舉辦嘅大日子,唔知你有冇參加呢?如果有,嗰日喺東隧口時,有冇見到一部單層巴士行過呢?我估單日早上只有我一部隧道巴係單層嘅,所以你可能見到我!我都見到你,喺好多好多人中間著住嗰件T恤喺度行......哈哈,真係好多人呀,好墟撼,唔好話跑,真係連行步路都難呀!但我都係想參加.
         好喇好喇,又再再講返正題!話說早幾日我真係想去報名參加噶,唔係為乜,只係為咗件衫.我覺得馬拉松嗰件衫好似係一件超級名牌!用錢係買唔到嘅,以前喺街度見到有啲友仔著住佢嚟跑步,幾有型;後來喺健身院又見到啲甲乙同丙又著住,感覺上,做運動嘅人一定要有一件馬拉蟲T恤......當我見到佢哋著住嗰陣,三個字,用三個字形容我嘅心情--我妒忌!
         所以就係為咗嗰件衫,我決定報名參加比賽!正好有個卜友話佢參加咗,我即刻問下佢點參加,點知佢好直接同好明確咁答咗我:"今年已經截止咗!"當時我個心就好似嗰日喺上海見到伴娘上咗人哋部豪華大房車咁,連個天都灰埋!天啊,點解要咁對我!
         嗰幾日同佢傾咗幾句,佢話有專車接走嗰啲跑得慢嘅人,仲約我明年一齊跑添!咁講完,個天先開始見到曙光.好,我要好好練習,我已經為自己訂下目標,就係畀專車車去終點,千祈唔好畀救傷車車去醫院!