特餐中的特餐

星期六下午，到粉嶺墟『特餐』食店吃特餐，之前已幫襯過兩三次，貪佢地嘅食物比一般茶餐廳款式特別d，冇咁行貨。但今天好好運，遇上了那位應該是餐廳老板，為我們泡製了特餐中的特餐。

南北杏點了牛肉通粉配雙併 (碎蛋白及火腿)三文治，當伙計把三文治送上時，那位餐廳老板就話南北杏應該叫『鴛鴦蛋』，更好味。但餐牌上是沒有寫上鴛鴦蛋這個選擇。南北杏就問鴛鴦蛋係乜？餐廳老板就話你下次試下就知。好啦！南北杏正準備為眼前嘅三文治拍照時，餐廳老板突然說：『唔好影』，南北杏即刻打左個突，例牌『吓』左一聲，心想唔係啩，以街坊生意為主嘅餐廳都唔比影相？跟住餐廳老板就說：『比個驚喜你』。就把三文治拿回廚房叫人加工，再送上時就係『鴛鴦蛋火腿三文治』。

鴛鴦蛋其實是凍碎蛋白和熱炒蛋，各在火腿嘅一面，食落時有凍蛋又有熱蛋，口感不錯。

鴛鴦蛋三文治

牛肉通粉也好吃

冬蟲點了朱古力西多士，當伙計把西多士送上時，餐廳老板就說：『比多個驚喜你』。又把西多士拿回廚房叫人加工，再送上時，就係西多士面上加了綠色的香草。南北杏最初以為那些香草是Rosemary，餐廳老板就說：『唔係，Rosemary會搶了西多士嘅味道』。南北杏再近距離聞下，的確沒有Rosemary嘅香氣，就問下係乜。餐廳老板就說：『你估下啦，埋單先話你知』。那些香草吃落冇乜味道，但加上了又令西多士嘅賣相很好看，而且它的樣子很面善，終於都給南北杏猜對了，相信廚藝高手或喜歡吃東西嘅朋友，一看就知係乜野香草。

『特餐』在大埔墟亦開了一間，餐廳老板要兩邊走，今天算是有緣，就送給我們兩個驚喜吧！

我們非常欣賞餐廳老板對食物嘅誠意，不斷為一些慣常吃嘅食物加點變化。