拜山

唔經唔覺細佬都走左5年  自從生左國本之後, 只係去佛堂裝支香拜下細佬, 都無去過骨灰龕, 今日襯阿爸、阿媽、海豚、三姨去拜山, 人手充足  就等國本放左學同四姨帶埋思妤去山卡拉將軍澳華人永遠墳場拜細佬, 仲順便拜埋五叔公 & 表舅父

而家d骨灰龕佈置真係愈來愈靚, 幾乎每個骨灰龕單位都有佈置陳設/傢俱, 中式、西式、日式、玩具 . . . 咩都有, 令拜山減少唔小傷感既感覺, 師奶仔都要好好物色下呢類擺設, 搞搞新意思

~~~~~~~~~~~~~~~~~~~~~~~~~~~~~~~~~~~~~~~~~~~~

國本對於拜山, 覺得非常新奇, 不斷係度拜拜 & 上香, 三姨同國本講, 佢地(先人)食飯食呢d架(香), 國本真係一路上香, 一路叫(先人)「食飯喇！」

國本仲拜到上左引, 指住其他先人講「到(拜)呢個喇！」 真係童年無忌