網誌分類：生活點滴 |
唔知大家玩過既Blog/交友網有幾多個呢?最鐘意﹐最常玩既又係邊個呢?
由讀書時玩既Open Diary, Teens Open Dairy, 到之前勁hit既Xanga﹐Friendster﹐到而家既MSN Space﹐Facebook同Yahoo Blog﹐大大話話都有10個8個﹐但每個都只係玩一排﹐發覺自己都幾貪新忘舊。暫時黎講﹐寫得最多既可能係MSN Space﹐除左MSN Space多d野玩﹐可以擺歌﹐又有相簿﹐鐘意點整就點整之外﹐唔多唔少可能係因為"她"&"他"﹐其實都冇直接關係既﹐只因為"她"&"他"都係我既MSN contact度唧。
最初寫OD既原因亦都係因為她。果時每日都會睇她既OD﹐每篇OD我都會留message回應﹐她又會再覆返我﹐寫下寫下﹐橫掂都係寫﹐不如自己都寫OD﹐等她回應下我﹐就係咁開始左寫OD。雖然我知道睇既只有她一個﹐但我每日都spend好多時間(其實可能係我打字慢)﹐用好多心機去寫﹐每篇都加background music。我地兩個分隔兩地﹐但感覺好近﹐我覺得果時係我地兩個最friend同最開心既時候。曾經天真咁認為我地既關係﹐呢個感覺會一直落去。好多時都唔明﹐點解d情侶當初話到幾愛對方﹐拍左拖好耐﹐到最後都係會散﹐仲要鬧晒大交﹐不歡而散﹐我唔想我地都係咁﹐10幾年既友情﹐我真係唔捨得。呢一年黎﹐我一直都以為係大家忙﹐唔知道係出左事﹐係咪我太遲頓呢?自從上次MSN之後﹐我諗過好唔好打電話去解釋﹐但唔知點解一拎起個電話就好驚﹐驚唔係相對無言﹐講多錯多﹐就係會炒大獲﹐結果都係冇勇氣去打。我知就算點講﹐大家都係唔容易改變自己諗法既人﹐可能不了了之係最好既辦法~~
置於"他"﹐一個曾經係我心目中佔有重要位置既人﹐唔知點解﹐雖然好耐都冇聯絡﹐但好多時得閒既時候都會諗起他﹐唔知仲有冇機會見到他呢﹐不過可能他已經唔記得左我lu。話說係偶然既機會下知道他有寫OD後﹐就日日都去睇﹐仲咁岩我同佢都係同一日開始寫﹐覺得我地仲好有緣﹐不過我諗他可能唔知我有睇﹐他寫既野全部都係關於女朋友﹐同女朋友散左(我估)之後﹐已經冇寫lu﹐直到而家﹐唔知他係冇女朋友定係冇咁既心機再去寫﹐始終知道他近況比唔知好......
今日老細去左旅行﹐係Office冇野做﹐諗左好多野﹐係咁發白日夢。
PS. 好野﹐Yahoo Blog終於都可以放音樂lu﹐始終覺得冇音樂既Blog唔完美。
