沉迷定係堅持?

今日搭長途巴士返工, 溫暖既陽光照入車廂.  令人諗左好多野.

話晒都就黎去外國, 應該有好多野要準備, 有好多野要計劃至係.

但我近排做d乜?  除左打機, 就係打機... 一個字: 頹!

雖然隻 game (monster hunter) 真係幾好玩, 但太好玩既 game, 都好易令人迷左落去.  尤其是我既性格, 係好容易沉迷一樣野, 好難先可以制服自己.

每樣沉迷總會有個原因 (或者作個原因俾自己!), 沉迷賭博會話"唔賭唔過癮", 沉迷食煙會話"唔食唔精神", 至於打呢隻 game 我會話 "enjoy 同人並肩作戰既樂趣"...  一個好似幾好既 reason, 但其實原來只係一個藉口.

今日車廂內既陽光終於照醒左我.  唔得, 要開始諗下將來喇! 7 月中喇!

再諗諗下, 呢種容易沉迷既性格, 係咪可以善用一下呢?  對一樣野沉迷, 同對一樣野堅持到底, 只係一線之隔.  識得自律同衡量既話, 可能都會係一個優點.   嗯, 一於咁話.