自助午餐

25092009

早排諗住搵一日得閒就同嫲嫲、晴晴一齊去食自助午餐，原先諗住近近地去返沙田食，點知原來帝都同麗豪酒店嘅自助午餐都係冇生蠔食嘅，咁就為有上網搵吓邊度嘅自助午餐有生蠔食啦，咁最後就搵到一間叫『仕德福山景酒店』，而且佢仲得到『必吃食店大獎2009』之『必吃自助餐』大獎，所以就去咗呢度食啦。

咁去到就諗住即刻去拿生蠔食啦，點知得d冰，冰上面冇生蠔嘅，咁為有食住第二d野先啦，而佢其他野食都唔係好多款，都係一d普通野食，連魚生都冇，激死。

但都冇計啦，都嚟咗啦，咁為有食住第二d野等d生蠔出啦。

你哋睇吓，連生果都食咗啦，連生蠔都仲未食過，真慘‧‧‧原因係其實佢都有出過生蠔嘅，但係佢一出就出得十幾隻，而每次一出生蠔嘅時候，d生蠔都未行到張枱嗰陣時，d阿毛就已經搶曬啦。我要等到第三輪先攞到四隻咁大把，仲要係等d阿毛食到唔食先輪到我食呀。而d生蠔仲係丁屎咁大隻，又一次激死。

食完呢四隻生蠔之後，諗住等佢出再攞多一次啦，點知等極都唔出，咁我就叫個侍應過嚟問佢啦，佢先攞咗三隻咁大把嘅生蠔過嚟俾我呀，又一次激死。唉‧‧‧以後都唔好再信d報紙雜誌或者網上d乜乜美食大獎呀！