第一次睇煙花

01102009

今日係國慶60週年，而今日夜晚又有煙花睇，本來都冇諗住睇嘅，因為太多人啦，費事同人迫。但係諗吓諗吓，晴晴又未試過喺現場睇煙花，所以就同晴晴去睇煙花啦。

咁daddy就諗倒一個地方係冇乜人，而且又係對到個煙花景正一正嘅地方，但係唔知可唔可以入到去。最後都係去咗先，諗住唔得嘅話就當去街食飯啦，點知雖然有d阻滯，但係最終都入到去睇煙花，真好彩！

Daddy同mami都係第一次喺呢度睇煙花，原來個景真係一流，可以睇晒成個煙花景，而且呢度真係冇乜人，完全唔洗同人迫，唔知係唔係呢度好空曠同埋幾近放煙花嘅地方，所以放煙花嘅嘭嘭聲都幾大聲吓，攪到晴晴一開始聽到d嘭嘭聲嗰陣，驚到好似成隻樹熊咁抱住daddy，但係過咗一陣之後就習慣咗啦，可以一齊睇煙花啦。