見識3D電影+晚飯@小南國

昨晚同老公貪得意學人去imax睇3D電影, 戲飛竟要$100張, 以為收得咁貴一定有佢過人之處, 滿懷期望咁入場........

我本身已經係四眼, 仲要再戴多個幾重吓既立體眼鏡睇, 睇咗10分鐘個鼻位已覺得好大壓力。套戲既3D效果真係造得好迫真, 落雪時令你好似身處其中咁, 主角係天空飛既時候都令人覺得真係跟住佢係天空飛緊咁, 初初飛覺得好得意, 飛得幾飛就開始暈, 再飛兩飛差D嘔咗出嚟, 好彩未食飯嘔唔出。之後再有飛既鏡頭我都唔敢再望銀幕, 唔望得幾次又差D訓著埋, 因為套戲真係幾悶, 悶場位足足佔咗半場戲, 而且劇情又麻麻地, 劇中人物既造型又肉酸.....成套戲比我最大既感覺係好有聖誕氣氛, 睇完場戲好想去食聖誕大餐 

咩戲? 聖誕訟是也! 呢套野值唔值得入場睇真係見人見智!如果你真係打算入場睇而又打算睇3D版既話, 安全起建帶定白花油入場啦!

睇完戲成9:30即刻去醫肚先, 去咗環境好舒服既小南國上海菜館。

-招牌生煎包: 皮造得鬆軟, 內裡肉汁豐富, 好有水準! $30

-雪菜肉絲炒年糕: 呢個好普通, 我炒得好食過佢, $68 唔抵食!

-椒鹽小黃魚: 造得皮脆肉嫩, 可惜有點點腥味 $25/條

-蔥油拌麵: 呢個好得呀, 蔥油好香, 麵條彈牙, 食完齒甲留香, 令人回味! $58

-香汁鴨舌: 早前係台灣食完卥天綠, 有了對比, 味道雖不及卥天綠, 但鴨舌細細條卻嫰口多肉, 勝過卥天綠的大而冇肉鴨舌 $68

-烤夫: 味道偏甜, 加入毛豆, 令口感更清爽 (現憑DBS信用咭, 滿$250送烤夫一碟)

-我家大少指定要食的清炒豆苗: 豆苗有點點老及嗅菁, 都係選蒜蓉炒比較安全 $78 (以咁既價錢最好緊係係屋企自已炒最妥當啦!)

-桂花酒讓小丸子: 丸子不及又一棧的出色, 桂花卻挽回不少分數, 因為係用上等貨, 桂花清香凝神, 食完成個人舒服晒. $25

-小南國@IMAX-L6