搬屋

2009年9月8日，結婚13個月，冇寫blog亦已一個月了。期間當然發生了很多事，但依家又懶得寫了。但有一件事不得不寫的，便是我們快要搬屋了~~

樓市暢旺，決定把我們第一間屋賣掉。雖然還未跟任何買家簽約，但想買我們層樓的人很多，只是阿cy始終在那兩、三萬裡跟買家爭持，所以還未賣掉... 為免一旦賣了冇地方住，我地上個月尾開始去睇租盤(我們覺得現在先租比再看清楚樓市比較穩當)。先去咗九龍灣睇，因為想搵d近我屋企o既樓。但德福、淘大比我想像中舊同差，睇咗幾個單位，真係有d想唔搬出黎算喇。跟住又睇咗得寶，都ok喎，翻新過大堂，有個單位仲睇到海景添... 跟住又睇咗藍田，感覺係﹕太舊了！最後睇觀塘，當然，觀塘d樓普遍都起碼十幾廿年以上。睇咗一輪，最後在兩個位於觀塘的單位二揀一。

單位一﹕

宜安中心4樓一單位﹕638呎，內籠半年前全部翻新過，現租給一家原本住在附近但因屋企裝修而暫住的人。但這家人用得也很新淨，所有地方也感覺新及乾淨。而且地點非常方便，落下有通宵小巴去港九新界，行去地鐵站只需大約5分鐘，樓下24小時超市及食市樣樣齊，係正中o既市中心，我行路返工亦估計只需5-8分鐘。但由於是市中心，而且低層，嘈音較大，空氣亦較差。另外，亦因擔心附近有食店，而且低層，我怕會有機會出現我最怕的東西 所以最後冇揀呢度。

單位二﹕

康濤閣17樓一單位﹕628呎，價錢俾宜安中心那個貴一千蚊，但細10呎。上手住客搬走不久，現在裝修中(但廚房同廁所佢係唔會裝修的)。單位四周環境優雅開揚。單位是單邊，一面望山、一面望公園及球場(其中有少少俾隔離單位遮咗，嘻嘻)。單位較光猛，而且客廳及飯廳較宜安中心那個寬敞(宜安中心那個主人房很大，因為原本是三房，但將其中兩間房打通)。這裡房比較細，但夠用便好了。這裡很近我媽媽屋企，行唔駛5分鐘就到了。而落觀塘則可坐不同小巴(因位於山上)或行10分鐘便ok了。而我估計行15分鐘就可到公司，cy可在門口轉角巴士站坐619返工，唔駛轉車，爽！

綜合以上各項，我們揀了環境比較好但貴一千蚊的康濤閣。遲d收咗鎖匙再影d相post出黎。到時又可發揮我家居佈置的才能了