最漫長的十五天

本以為走出公仔箱後，外出機會會少很多。不過，現在外出工作一次，可能會比以前更「大鑊」。

入了新工第一次出外（過埠的不算吧！）是年頭到北京，前後不過四天。那次的感覺，一個字，「陪」。雖然期間遇到的事令我很不爽，但話說回來，工作量著實不多，算舒服的。

心想日後出外應該也會如此輕鬆，可是......

下星期即將要到獅城考察，個團話大唔大，話細唔細，都成十個人，還要不全是自己公司的人。

這次和之前的很不同，成個團的安排，由頭到尾，瑣瑣碎碎的都要跟。從寫建議報告、跟進聯絡、排行程......全部都要做（老實講，個行程到今時今刻都未定實呢?!不過，好在有同事幫手book 酒店同車，還有訂紀念品）。到今日收到Mail，連請人食中午飯張餐單都要揀，做做下自己好似變成旅行團領隊（雖然是自己多事，但我連團友手冊都搞左一本呢）。唉......

除了安排行程，去到當地同人見面又要介紹自己公司：準備PowerPoint（中英雙語）、影定要派的資料同小冊子，未出發已經一大袋資料。唔單只咁，話明考察，影相少不免，而且還要錄下考察的過程（唔知好彩還是唔好彩，竟然俾我借到Cam?! WHY!!!!!! 唉......）。斷估返到來肯定要寫份「賽後檢討」：考察報告是也。

原來出外一次，事前要做這麼多東西，好累。

不過，惡夢不只這樣！

去完五天獅城煉獄之旅，返到小城估計無十二個鐘，又要即刻走上京師學習學習，一走又八天。在公仔箱做左七年都未試過咁一氣呵成，只好責怪自己決定的上京學習日子吧，呢D叫做「攞嚟賤」!!!!

膽敢預言一句：熱完即刻凍，我一定病！