一鳴得‧一鳴失

前晚去鞋舖攞返對之前未有貨嘅波鞋,跟住就去 荃新天地 嘅 鳴門 晚餐一頓...

之前喺牛頭角果間真係唔得,諗住呢次喺荃灣俾多次機會呢間嘢啦,點知...

發覺牛頭角果間可能唔係佢哋分店嚟架...

因為呢間張餐紙完全無提及過牛頭角有分店...

剛剛再上佢官網睇睇...真係無牛頭角分店架,唔通真係咁啱同名 ?

但係唔知係咪荃灣間舖唔係開咗好耐定係試業中,所以都係喺官網搵唔到架 ~

唔好研究呢 d 嘢喇,都係好唔好食緊要 d ...

特上刺身拼盤 $ 168.三隻甘蝦,四件三文魚,加四款廚師揀選嘅新鮮剌身每款兩件...

件件都好新鮮 ~ 正 !!!

鵝肝紙米卷 $ 58.包有鵝肝同飯,唔係用蔬菜,食落似壽司,但係 d 飯索咗 d 鵝肝油,味道都唔錯 ~

鹽燒油甘魚鮫 $ 58. d魚皮味道唔錯,但係肉身略腥,應該係肉身厚咗 d 同埋我覺得呢舊唔算係魚鮫位嘅關係...

反而一向怕腥嘅 catcat 話唔覺腥喎...呵呵呵...

跟住就係清酒煮蜆 $ 60.湯本身無乜酒味,但係估唔到 d 蜆又有酒味喎 ~ 肉質同味道都唔錯啦 !!!

最後係...

極上牛肉稻庭烏冬 $ 70. 麵身煙 " un "唯獨本人對肥牛要求幾高,所以覺得麻麻,但係麵身真係幾好食.

總括全晚餸菜都唔錯,雖然價錢都算中等,但係都係值得嘅,而我最 buy 嘅係佢話俾我哋聽,會先上咗刺身先,食完再上乜再上物,每碟餸嘅上枱時間都剛剛好,唔會攪到成枱餸攤凍晒,又唔會等好耐都無嘢食,侍應們總喺適當時候出現...(可能咁啱無乜客啦,hehe...)

所以呢間我係俾 4/5粒星嘅 !!!

而上次牛頭角果間由食物到服務加埋坐位舒適度同呢間比較,真係完全唔掂呀,同呢間真係差之千里呀 ~

所以話同是叫鳴門,但係一間鳴門得,一間鳴門失...敗囉 !!!

~ The End ~