一年一度的公司聚會 - 春茗

今晚係我地公司一年一度全體總動員o既聚會 - 春茗﹗我地不嬲都好少全間公司o既人出黎食飯。 (當然，我依個康樂部組長都會成日搞o下活動o既，但係唔係次次都有咁多人出席囉﹗)

公司o既揸fit人今晚揀o左旺角雅蘭o個間稻香食春茗，其實我對依間酒樓冇乜好感，一來好迫好多人，二來o的services真係好九流﹗雖然，我地今晚包起o左一間房，但係，開o左三檯麻雀之後，竟然係冇位可以再行﹗你地話係唔係好迫呢﹗

食飯之前o既娛樂就梗係打麻雀啦﹗我本身就係一位初哥，所以我就坐o係低消費o個一檯打o左一陣﹗(所謂低消費，即係$5，$10呢o的﹗中級消費就係$10，$20﹗唔好以為高消費係$20、$30，我o的同事打麻雀o既高消費係……三番起糊，最低消費係$64﹗﹗﹗嘩﹗如果我坐落去依檯度打，我諗我成份糧都冇晒lu﹗)打麻雀依家野都係娛樂o下o者，所以我最後都係冇輸冇贏﹗(而高消費o個檯，贏家竟然可以有$1,700袋落袋﹗真犀利﹗)

好喇﹗食飯時間到喇，個個都預備埋位喇﹗我地成公司有17個人，竟然要我地迫埋一張大檯度坐，我地o既揸fit人仲要只係嗌o左一圍酒席o既餸(一圍即係12人)，你話佢地係唔係真係〝好好人〞呢﹖今晚仲要個個餓鬼上身，o的餸菜一埋到檯，唔洗30秒就俾佢地清晒﹗(小女子因為食緊減肥藥，唔係好肚餓，所以食o左幾啖就收手，留返俾佢地班餓鬼吃﹗)

一輪爭食之後，就梗係到抽獎時間啦﹗公司近依三年都有玩抽獎﹗(但係次次都冇我份抽中﹗)今年一開始就抽三獎先，由我地公司o既會計阿姨抽中，(我心入面諗，連三獎都抽唔中，今年都係冇我份o架喇﹗)好喇﹗輪到二獎喇﹗好緊張﹗哈哈﹗終於都輪到我喇﹗我終於中獎喇，我等o左依個中獎機會等o左我三年呀﹗真係好開心﹗好開心﹗好興奮﹗超高興﹗ 之後再抽大獎﹗由我o既好拍檔奪得﹗(我地中獎依三個人平時o係公司係坐埋一齊，所以我地中獎真係特別開心﹗)當然，中o左獎o既三位 - 即係我地當然要俾人叫回禮啦﹗會計阿姨因為係長輩，所以佢地唔敢玩阿姨，反而我同我o既好拍檔就難逃一劫喇﹗先被罰飲酒，二獎 -即係我就飲半支，而大獎就飲一支﹗(嘩，平時唔多飲酒o既我飲完之後就即刻變o左關二哥，個個人都話我唔飲得﹗其實，我就真係冇乜事，只係覺得熱熱地，都冇醉﹗- 睇o下我而家四點幾仲o係度打緊blog就知我冇事啦﹗只不過學阿誠話齋，要o係適當o既時候咋死﹗)

抽完獎之後，已經係凌晨12:00喇，大家都好攰，各自歸家喇﹗而我同另外兩位同事就去o左一間Cafe度坐o左一陣，差唔多二點半就回家休息喇﹗

今晚真係好開心﹗抽中二獎，雖然係二獎，但係都係一個Luck黎o既，所以我會將我o的Luck同我o既屋企人分享，當然，包括埋阿誠啦﹗ 雖然我同佢之間仲有o的野未解決，但係聽日見到佢，我都想同佢一齊分享我o既幸運，同埋會解決埋之前o個件事﹗等我o既消息啦﹗