《淚王子》

純粹陪人去睇，我唔知楊凡有幾出名，更加唔知張孝全係乜水(只覺得佢個款成件中年陳冠希咁……)

故事背景係響二戰後國民黨敗退(著草？)台灣，一九五四戒嚴期間其中一個空軍營內發生。主角係一個小女孩，父親本來係空軍少校，但父母因被懷疑匪敵所以被捉，結果父親被槍決，母親「勞改」後獲釋，更改嫁懷疑係出賣父親0既一個朋友。

據講故事係真人真事改篇，感染力0黎自一個小女孩眼見0既巨變 - 父母離異於是要寄人籬下、照顧自己0既叔叔係出賣爸爸0既人、對自己好0既朋友父母親亦被懷疑係左傾。生於呢個年代，自小就要承受呢種無奈。

主題兼戲名0既《淚王子》其實係耳熟能詳0既兒童故事，主要係講一個因為睇唔慣世上不公，最後凍死街頭0既故事。但其實《淚王子》0既不公係來自貧富沿殊，本片0既不公則0黎自政治敏感，本則上難以比較，亦有0的唔貼題。結果戲裏面《淚王子》一書，其實只係一道中國、台灣步向世界以及國共兩時代交接0既橋樑。

角色方面其實學朋友話齋，係有少少同時代唔配合。主角們太過偶像派，青靚白淨兼有型得唔似戰敗者，反而一對女兒比較有農村味，較切合背景。

最後想講0既係，近年睇0既幾套台灣戲，包括《渺渺》、《愛的發聲練習》同呢套都好，再加上未睇過0既《刺青》也好，都硬係要加入同性戀元素。究竟台灣片係咪真係想人將「台灣片=同性戀」呢條等式印入全世界觀眾腦袋內？咁0既話，以後睇台灣片，大約要一開始就估「誰是同性戀？」了。