貓咪受傷了　（可以出院了，請問有無人要呀？？？）已被領養

謝謝各位關心雲兒的卜友，雲兒已於18.6.09被領養了

－－－－－－－－－－－－－－－－－－－－

15/6/2009

今日探雲兒影的相

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

各位好人、大善人、想養貓的有心人請快快出手啦, 老板娘今日又追問我幾時有人要呀! 因為佢要等拆線所以先肯收留多佢幾日咋! 我幫呢隻貓只可幫到呢度,佢康復完拆埋線就要返去街上繼續流浪生活

~~~~~~~~~~~~~~~~~~~~~~~~~~~~~~~~~~~~~~~~~~~~

12/6/2009

雲兒今日出院後，依家暫時有間寵物店肯收留佢幾日，如有興趣可來大埔睇貓．

雲兒超乖，我用手餵佢食嘢都無咬我隻手，唔止我，每個護士姐姐都勁讚佢超乖，每日洗傷口都無扭計，仲任摸任抱，佢真係好乖巧ga!!!!!!

仲有, 胃口超好,好大食添, 不過大食好呀, 食得多身子都好d嘛!! hehe

各位想養貓的好好人, 請快d收養佢啦! 咁辛苦捉佢去做手術,醫返好梗唔想放返街度, 四處流浪好陰公啫! 日灑雨淋不特止, 又被烏蠅虫同咪蚤蚤欺負.

領養條款：

（１）領養費用全免

（２）但要承諾由領養日起計２個月內幫牠絶育，以免被用作繁殖工具

（３）要接受家訪及不可２４小時困籠圈養

（４）如發現被領養貓隻有被虐情況，本人有權取回

為了保護貓咪，請各位欲領養者體諒下啦！

---------------------------------------------------------------------------------

11/6/2009

診所剛打來,話傷口己經縫好針,明天要出院了,如果無人要既話,又要放返出街,好慘ga,如有興趣的朋友快d留言啦!

姑娘話佢好乖好聽話,洗傷口完全無反抗.咁乖一隻貓,如果喺街上生活真係有d可惜.

－－－－－－－－－－－－－－－－－－

6/6/2009

今日去動物診所探貓咪，臨時幫佢改咗名叫’雲兒’，誰不知原來佢係男仔。問過護士貓咪的情況，知道傷口好深而且頗嚴重，捉咗好多蠅蟲出來，好核人！不過就話雲兒好乖，洗傷口時完全無反抗．但雲兒好似唔認得我，叫極佢都無反應．唉～睇見佢就凄涼，佢應該好辛苦．

呢樽就係貓傷口捉出來的蠅虫

---------------------------------------------------------------------------------

5/6/2009

不知是否摺耳不夠好運，原本５月尾有期捉佢去絶育的，但因為暴雨關係，擔心絶育傷口發炎而延期.誰不知前幾晚發覺牠有個好大的傷口,嚇死我! 原來傷口好多蟲,我咁大個女都未過動物d蠅咀傷口,非常恐怖!!諗起都起雞皮

昨晚捉佢時,點都唔肯入籠,誘惑咗很多次才成功.在此不得不多謝mariu女士,真的幫了我好大忙,無佢,我根本捉唔到貓咪.

在寵物店寄居咗一晚,今日送了去旺角麥花臣動物診所,由何醫生施手術診治,他說傷口好嚴重,蠅咀蟲已經侵食到口部,希望無影響到d神經線,要留幾日醫院,有機會康復唔到.

上天保祐,希望貓咪可以完全康復。而康復後急需一個家,希望有興趣收養的朋友可留言.

唉!呢排都唔知係咪行衰運,我亞朱女又病咗(皮膚病),要打針食藥半個月. 真係唔明白點解皮膚忽然會變成咁, 諗諗吓係咪自己太寵佢,每日都買零食俾佢.所以攪成咁!?

我最鐘意睇我朱女ge背影,好可愛! 佢就係咁經常係窗台度睇街景,每當見到有狗經過就會發出依依哦哦的聲音,好盏鬼,hehe