高雄吃喝第二天及完結編@六合吃不停(22-23.3.08)

昨晚浪漫完愛河之後, 返到酒店果然特別好訓哩

第二日又精神亦亦地迎接新既行程啦

第一站 : "孔子廟" 這裡是仿宋代孔廟與山東曲阜孔廟樣式而建的高雄孔廟，富麗堂皇，其規模堪稱全高雄之冠。除了欣賞其巍峨莊嚴的建築，亦可了解「萬世師表」孔子的生平事蹟。

去完孔子廟, 我地就去了 "左營春秋閣", 這裡建於蓮花池畔，依山傍水，景觀秀麗。為紀念武聖關公而建，充份表現出中國傳統中的對稱美。春秋閣前端有一尊騎龍觀音像，據說觀音菩薩曾騎龍在此現身，故建像紀念。

跟著我們就去了吃午飯, 飯後我地就去了 "奇美博物館" 參觀, 這裡由西洋繪畫雕塑、樂器、古兵器、自然史、古文物等五個部門組成，館藏內容豐富多樣，包括了西元前八世紀的埃及文物、世界頂級的珍貴名琴，到數百年前的日本武士刀、文藝復興與巴比松等畫派的經典之作，以及獨步全亞洲的鳥類標本等多元文化的收藏，可惜館內不準拍照, 所以不能和大家分享了。

行完奇美博物館, 我地就去左 "新堀江夜市" 瘋狂 shopping, 這裡為高雄的西門町，各種服裝飾品琳瑯滿目，是最受年輕人歡迎至IN的新興商場, 我荷包當然又大出血一番啦。

shopping 完就梗係要醫肚啦, 由於今晚我地去六合夜市, 所以晚餐就順理成章係呢度解決啦, 咁重好, 等我可以試下台灣出名既地道小吃嘛

六合夜市, 我來啦 ~~

夜市除左小吃之外, 重有好多街頭小玩意

台南出名木瓜牛乳, 不過我無試到, 我試左 "蜂蜜苦瓜汁", 真係好好飲呀

台灣既苦瓜係白色, 真係好特別呀

朋友同爸爸就食臭豆腐, 重勁讚話好好味, 我不嬲都唔食臭豆腐, 爸爸係咁叫我試下, 咁我就試少少啦, 不過我始終唔係咁接受到果種味道呢

我去左幾次台北都未食過蚵仔煎, 自從睇左 "轉角遇到愛"之後就一直好想試, 今次來到呢度點都要一試呢

可惜, 無我想像中咁好味, 大家睇下佢既賣相就知啦, 可能係每間水準有所不同啦

無骨雞腳, 辣辣地好好味呀

"老" 水豬手, 導遊大力推介, 可惜太貴啦 (HKD30.00 得6件), 媽媽話唔抵食, 所以無試到

蝦和蟹, 睇唔出佢係煎定炸, 只係覺得好假, 所以無試到 

試左度小月擔仔面, 感覺似油面 + 蛋 + 肉碎, 約港幣十多元, 好普通, 麻麻地好食

胡椒餅, 呢樣真係好好食, 食個六合夜市得呢一檔, 所以大排長龍, 我等左好耐先買到, 入口熱騰騰, 簡直一流呀

呢檔生果檔真係好多生果賣, 我買左士多啤梨, 真係好香甜好好味呀, 跟住又賣左蓮霧番酒店食, 真係超正, 又清甜又多汁, 同香港既簡直無得比呀, 我重一口氣食左4個添呀

跟住我重鼓起勇氣地試左著名既 "七里香", 以前遊台北時一直都唔敢吃, 今次爸爸買左一串來試, 重話好好味叫我試下, 咁我咪試一舊囉, 估唔到又唔係咁差喎, 完全食唔出係雞 pat pat 來, 又無怪味, 其實都 ok 架

來到呢一刻, 我巳經飽到出唔到聲啦, 本來重想試埋面線和木瓜牛乳, 不過真係食唔落啦, 不過我今次真係好開心, 因為都係頭一次咁盡興試左咁多夜市小吃 (之前係台北每次都落雨, 所以無心機行),  所以番到來肥幾磅都係抵既。

歡樂既時光特別快, 一覺訓醒到第三日, 又係返香港既時候啦, 早上我地去左 "夢時代" 商場 shopping, 果度有一間誠品, 咁我同朋友當然係打書釘啦, 咁爸媽就去左餐廳撐枱腳及買手信, 話咁快3小時又過去, 我買得6本書咁少真係唔夠呀,  如果比多少少時間我就好啦, 我肯定買得更多書呀。

就係咁我地就帶著開心同滿足番香港啦。

後感 : 好多人都話高雄唔好玩, 我也覺得今次既旅程係無乜景點, 不過能夠和屋企人和朋友一起大吃大喝歡度三天開心假期, 點都係值得的呢。