人情冷暖！

朋友嘅離世令我好傷心，過咗咁多日我總算平服返，但竟然俾我感受到一啲嘢。

事緣係响依段日子我不停搵一啲舊同學，問佢哋知唔知發生咗依件事，同問佢哋會唔會去送我哋嘅朋友最後一程，如果真係去唔到會唔會做一啲心意(白金)，雖然有幾個舊同學都好好，其他嘅都會問我同一句嘢就係:「乜你仲有同佢聯絡咩。」或者好冷淡噉講一個字「哦」。

其實講一個「哦」字仲好，因為佢擺明係冇哂感情冇嘢好講。但講「乜你仲有同佢聯絡咩。」嘅就真係令我有啲唔開心同費解，因為唔通好耐冇聯絡就等如你唔認識依一個人啦咩！唔通好耐冇聯絡就等如我同依一個人以前一齊嘅一段記憶就會冇咗啦咩！唔通好耐冇聯絡就等如係陌生人啦咩！

以前一齊玩過係我哋嘅緣份，依一段記憶係响我哋每一個人嘅腦裡面唔可以刪除嘅，依段會係我哋不斷成長嘅根基，唔好咁冷淡當啦！你想下日後人哋又噉對你，你又會有啲咩感受呢！