搬屋測試你忍耐力！我就忍唔到發咗火！

2006年12月29日我正式搬屋，之前搵咗好多間搬屋公司，最後搵咗間叫做「立誠」因為依間係最平一間，佢哋打價係搬哂屋企所有嘢$2,300，講返當日起初佢地由舊屋搬走都冇乜大問題，去到新屋當佢哋搬第一件嘢入屋時，佢哋就對住我阿媽講：「太太一陣你識做啦。」另一個就講：「得啦！太太搬慣屋識做咖啦。」我心想咁快就問攞貼士。我哋冇理佢哋，但佢哋不停將我哋啲紙皮箱大力拋落地下，話俾佢哋知有玻璃都唔理照拋，一啲大形家用電器如洗衣機、雪櫃、電視，成日話唔小心甩手跌落地跌到「彭」「彭」聲，又唔幫手駁返好啲線。又唔理我啲牆同門撞到花哂崩哂。最後搬哂啦我阿媽俾錢$2,300但冇散紙所以俾咗$3,000佢哋，我阿媽話:「你找咗俾我先，我再俾貼士你哋。」我哋一早計好佢哋6個人搬嘢每人俾$50貼士唔過份啦，點知佢哋唔找錢不特止仲話:「老闆娘潻啲啦。」我阿媽話:「嘩！你哋唔找錢攞哂$700做貼士仲唔夠仲要潻呀。」佢哋話:「嘩！我哋依啲辛苦工嚟咖，我哋有7個人呀（明明得6個人），仲有你哋搬咁多嘢又用咗我哋咁多紙箱，潻啲啦。」我哋唔肯俾佢哋而佢哋又唔係走，最後我報警佢哋先肯走最後仲要用一個好惡劣嘅態度講咗一句：「咁！祝你哋入伙大吉。（擺明係反話）」，我即時火都嚟！我即刻唔俾佢哋走要佢哋等警察上嚟，我再打電話去佢公司同佢負責人講，話佢哋啲伙計響道（勒索），之後佢哋響樓下嘅同事上嚟平息，我阿媽竟然只要佢哋找返$200就算數。攪到咁樣都仲俾成$500貼士到依家我都仲頂住條氣。

之後警察上到嚟因為對方走了佢哋了解咗件事就走咗！　

想搬屋搬爛哂屋企啲嘢然後買過哂新嘅，又或者嚴屋企啲牆同門太淨色想加啲花紋，又或者想挑戰下自己容忍極限，咁你一定要搵「立誠搬運有限公司」幫你搬屋啦！

網址：http://www.yp.com.hk/lapsing/