我的J爺爺~~

一九八八年暑假.......小JLam與J爺爺一如以往在玩個夠。回想起小時的日子常與爺爺一起去街，飲茶，妞計買玩具，快樂日子真不少....然而，J爺爺迷一樣既背景，當年终被仍是小學生的小JLam打開！

小J：爺爺............我想買呢個V型電磁俠超合金....好啦好啦...

爺：又買!!!!唔得!!!!一定要有理由先得!!你有冇默書100分？

小J：....87分........爭少少都買啦....

爺：點解你成日要買鐵甲人呢？

小J：因為我要保衛世界，申張正義！

爺：真正既保衛戰，並唔係乖孫所想咁簡單.........

小J：咁係點架爺爺？

爺：二次大戰既時候，日本由於明治維新既成功，戰鬥力大增！有所謂皇軍無敵既自誇！七七蘆溝橋事變後，日軍大舉侵略我國。日本軍當時根本睇唔起我國軍隊，特別係空軍！事實上，日本擁有三凌重工自行生產既先進戰機二千二百架，日本戰機機身輕，機動性能高，火力強！而中國空軍.....唉...只有購買二手各國雜牌戰機三百架，其中有D更非常殘破不全。可想而知，中國空軍落後於日本好多好多.........

小J：咁點算呀？

爺：唔洗怕！因為有保衛世界，申張正義既爺爺喺度！

小J：果然係我既爺爺！咁之後點呀？中國D飛機仔咁弱….

爺：一九三五年，一個出生於廣東，剛於軍校畢業，眼界最好，膽色最強既青年，準備以生命保衛中國既天空！

小J：眼界最好，膽色最強……咁考試成績呢？有冇100分呀？

爺：....87分........爭少少都得啦！

小J：好！亞伯！你可以出動喇！

爺：果時我重係20出頭既青年!!!!!未係亞伯!!!!!我所架駛既就係呢部機型為SEV-2XD，最大時速兩百三十點四浬，配備7.62mm機鎗2支，12.7mm機鎗2支。

小J：嘩~~~好老土呀~~~~

爺：當時我地知道日本仔既野心，我所屬既中國空軍第四大隊，亦明白到最好既放守就係攻擊！與其等日軍來襲，倒不如先發制人！所以，喺 一九三七年八月十四日 清晨，中國空軍主動對黃埔江上既日本海軍艦艇發動攻擊，日軍盛怒下立刻調動從台灣飛來的木更津聯隊與鹿屋聯隊戰鬥機，企圖一舉消滅南京、上海地區之所有中國空軍基地。日軍不料當日入侵的日本機群，遭到我地中國空軍第四大隊戰機反擊，結果中國空軍以六比零擊落日機，首開中日空戰全勝紀錄，打破咗「皇軍無敵」的神話！乖孫，你要知道駕駛飛機既始終係人。隊長講過，如果升空之前你己經認定自己死咗，咁樣你就可以決心作戰！喺八一四連續三天的中日密集空戰中，日本軍出乎意料地被中國空軍打得潰不成軍。爺爺係受過訓練既正規軍，我係第一群直衝過去瞄準敵機開火既！之後大家見到都士氣大振！一齊重創強敵！……咳咳咳….咳…咳咳……

小J：爺爺！你點呀？我帶你去睇陳醫生…..！

爺：冇事冇事…….咳…咳咳….老毛病老毛病。喺一次作戰時，爺爺部機既右邊機身中彈，其中一發察中咗我右腳，傷口深到見骨。所以爺爺行路一拐一拐....咳…咳咳…我地去買V型電磁俠囉。

小J：好嘢!!!!!! V型電磁俠打爆D日本軍！

爺：V型電磁俠係日本出個喎。

小J：……………………

爺爺後來同嫲嫲於國共內戰期間，移居澳門後再到香港。因軍藉問題改名為“韋琪”，並誕下多名孩子。到香港後改為從商，由小販到舖頭建立起J家既根基就係J爺爺一個人既努力！爺爺…..之後就交俾我孫仔JLam，延續J家既--------華麗一族故事！

爺爺…..你一定係喺青空之下陽光之中快樂咁傲翔天際………..向眼界最好，膽色最強，考試87分既爺爺敬禮！

J爺爺生於1913年，於1990年癌症病逝，享年77歲。