(尋家) 藍一樣的眼‧康復中1歲朱古力拉女在尋家

新狗帶原是給狗友的, 看RUBY多合用!

暫養媽媽喜愛朱古力

說她的膚色好像寶石

不如喚她作RUBY

帶藍的眼睛

願妳有寶石般的生命

RUBY

在等一個疼她的家

視她如寶石

是

您

嗎

？

尋日花滿滿上完堂， 跟住忙住執屋，三點幾同家姐落樓想去食嘢， 一到樓下見到隻狗， 行到頭耷耷腳軟軟， 又唔似係跟住主人。  家姐叫我走， 眼見隻狗想行過大馬路， 於是叫位女途人幫手捉住隻狗， 上樓攞狗帶同食物。 落返樓下見到樓上鄰居已經開罐貓罐頭比佢醫肚， 隻狗囡好肚餓， 行又無力。 問對面馬路間寵物店又話見過佢流浪一排， 於是同家姐鄰居及女途人帶佢去睇vet, 隻狗又唔多肯行， 最後我唯有抱佢去診所。

check到有晶片, 打去漁護署查到係寵物店登記， 都知係咩事  初步檢查個肺有一半白咗， 無發燒， 有金錢癣， 手腳都ok, 但牙齒就唔好又有牙漬, 估計一歲啦。 醫生話唔知要醫幾耐， 可B能佢半邊肺功能無得醫， 醫返得另外半邊肺， 咁佢跑唔到又可能去walk時又唔夠氣 ， 或許有幾年命， 都唔知醫唔醫到

可能見佢無主人登記晶片， 我哋又係街執佢， 都有叫我哋考慮PARK佢，　個護士又話佢個肺唔得，　醫返佢都享受唔到一條狗嘅QUALITY OF LIFE　．．．．．．　女途人原來都係姓花， 我哋又唔忍心，見佢都幾乖， 又識 sit, 望落又唔係咁差。  由於診所要閂門，　醫生開咗一星期抗生素及舒張氣管藥比佢， 皮膚就係其次， 主要都係一邊大脾甩毛雞尾包度大， 醫生唔開皮膚藥比佢， 因為有類固醇怕影響佢氣管啩　～　

之後我捃BACON媽幫手，　去相熟寵物店問有無暫託，佢哋話係另一間唔要，可能自行醫過唔得先拋棄佢，由於係行家，唔可以幫手，怕日後果間衰嘢又咁樣掟啲狗出嚟～　

囡囡眼睛藍藍地，又好精靈，識得SIT, 我哋同佢改名叫 RUBY, 依家係花街坊處暫住，但佢屋企有９隻貓，再下星期都要返工嘞， 屋企人又未必比暫住得咁耐，　但又唔去得我屋企　　星期六想帶佢去第二個醫師處攞 2nd opinion， 佢真係好得人鍾意， 尋日去捃地方時見到狗地都想同狗地玩， 病緊都精靈！  去到花街坊處就覺豬， 我哋一叫佢又起身飲水。 今日都有落街方便便， 行路仲係攰， 但好有胃口!

醫藥費我哋都可以分擔下，　麻煩大家幫忙睇下有無地方可暫養佢， 並發散幫佢捃屋企， 寶石囡暫時要食住藥， 幫手籌款醫佢　  如果您願意協助， 請留聯絡方法， 又或是有醫治上的分享， 都話過我知啦 　

http://hk.myblog.yahoo.com/bacon-bacon/article?mid=9210

樓上阿太聽到醫生咁講， 係電話中都聲淚俱下， 阿太都係貓義工， 有餵開街貓， 又知附近流浪狗遭遇。

我想起前年某一日朝，要入警校睇結業禮， 係灣仔合和對面， 見到個阿太walk隻西施， 旁邊有隻唐狗在嗅垃圾桶。 我望真啲， 原來唔係唐狗， 係一隻甩晒毛嘅金毛， 皮膚紅色一撻撻， 流浪咗好耐， 我想拖佢時， 佢好驚就走咗。 

一睇到流浪狗嘅故仔， 我就想起佢。 唔知佢最終係點  RUBY囡， 希望妳有愛惜妳的家， 就像大雄一樣！

http://hk.myblog.yahoo.com/eddy_cheng9/article?mid=5969