我衰咗喇!

點解咁多日唔見咗我？

嚡，今次真係老貓燒鬚，走唔完。迫住，真係要放棄。

越野馬拉松同埋今次哩個亞馬遜森林馬拉松賽事，最引人入勝嘅，係佢嘅難度。跑咗咁多次越野馬拉松，原來，同跑森林，又唔一樣嘅。真係諗唔到，冇預備過。唔怪得大家成日都話，亞馬遜係最難跑嘅森林。我而家知點解喇！

跑完第二日賽事，我嘅成績依然喺臨尾數番上來第三。第一日用咗差唔多8個鐘跑完，而第二日就用咗10個半鐘有多。其實真係唔算太辛苦。熱、潮濕，都唔係問題。反而9月份訓練嘅日子，有時香港天氣仲更加潮濕同埋熱添。

困難嘅，原來係地勢。同沙漠完全唔同。沙漠嘅一望無際，係就係令到人好熱，想搵個地方遮下蔭都冇。森林入面，你以為係踏踏實實嘅地下，原來，係危機四伏。

喺厚厚嘅落葉底下，原來冇一撻係平地。當你以為踏喺乾爽嘅地上時，有可能係蛇洞，又或者係蜘蛛洞。係呀，唔單止可能比佢地咬，仲可能好似我一樣，睇唔到係蛇洞，一腳叉咗落去，咁就會扭親腳。淨係第三日，已經扭咗三次。我隻腳真係踵過豬踵，冇辦法，唯有怨自己準備得唔夠充份，諗得唔夠透徹。

佢只係BB蜘蛛

不過未去過真係好多細微野係考慮唔到。平時跑沙漠，一大片平地，基本上好似自動導航咁一路跑就得。但係跑森林，真係好唔同。跑沙漠，第一，地下唔會有睇唔到嘅陷阱，亦都唔需要跑幾步就要彎低身捐過啲生得矮嘅樹枝。唔係話捐有困難，但係都要好小心，要隨時留意樹枝背後，有冇收埋條蛇喺度。另一樣困難係，之前喺網上面已經睇到，話森林啲樹枝好多都有刺。但係，講真，真係冇諗過係咁多刺，仲要係成吋咁長。所以要習慣嘅，係無論企得穩定企唔穩，都一定唔可以伸手出來扶住其他野，唔係仲死。所以叉咗隻腳落蛇洞幾次都唔可以扶，唯有焗住由佢拗柴，對腳，即刻玩完。

除咗對腳受罪之外，身體其他部份都唔好過得幾多。我成個頭都腫哂，因為實在避唔到咁多蜜蜂。避無可避，比佢地針到豬頭一樣。

又一次遺憾。今次真係做唔到『有始，有終』。所以我亦都成日話，要多啲了解，知多啲，就好似養寵物一樣，如果冇諗清楚，糊糊塗塗就去養寵物，就一定會好似我今次咁，衰咗！