心地要善良

據梁師傅講做得賢妻良母，要有五大條件，第一要善良大方，第二要處事精明，第三要言談得體，第四要生財有道，最後要知足常樂，有以上五種優點嘅女性，大多數是賢妻良母，深得丈夫和兒女嘅支持同愛戴。

所以只要搵出相配性格嘅五官特徵，就可以找出賢內助嘅面相，首先要留意個鼻，鼻為夫星，鼻要以圓厚對稱為佳，唔好有高低大小之別，而且鼻樑無節，加上鼻孔唔好太露，咁嘅面相就會善良大方，衣食無憂。

此外，鼻要與顴骨相配，顴骨要生得對稱同埋要有肉包裹，咁就會深得丈夫信懶同厚愛，到中年時候，更有力助夫取得事業成就，但顴骨不高不現亦冇所謂，最重要有肉包裹，咁都會持家有道，令丈夫放心拚搏。

聚財講能力

另外，據梁師傅講，太太係咪賢內助，還要睇佢係咪眉清目秀，女性眉毛生得清晰細潤，代表感情豐富，大方善良，對丈夫兒女溫柔體貼，千萬別被紋侵痣破，否則要做一位賢內助，就要畀更多嘅精神同力氣落去。

至於眼晴方面，一定要夠黑夠圓，明亮清晰，咁代表心地純正，磊落大方，處事會井井有條，理財方面更係難佢唔到，家用錢畀佢都有辦法變成財富。呢類女性喺床上仲要係溫柔體貼，有個咁嘅老婆，呢種男人只可以用幸福嚟形容。

而把口嘅外形最好係唔大唔細，事關大小適中，代表欲望不多不少，係一個知足嘅人，而且說話有技巧，唔會得罪人，牙齒白且齊，就代表婚姻美滿，合家和順，唔講是非，至於嘴角上揚，就代表心態積極樂觀。

晚運最重要

其實囡囡面相有以上幾點特徵，就可以做一個出色嘅賢內助，至於良母方面，據梁師傅講，仲要睇多兩個面相學嘅特徵，但係囡囡年輕嘅時候，係完全睇唔到嘅，要等到佢哋有番咁上下年紀，呢啲特徵至會出現。

第一就係耳朵要肥大飽滿，耳珠有肉，咁代表女性晚年福澤深厚，而且對教育子女別具心得，子女個個都可以長大成人，獨當一面。晚年除了得到丈夫嘅厚愛外，還得到兒孫們嘅喜歡，而且每個都會對你敬重有加。

最後係要地閣方圓，即係下巴嘅位置要有肉飽滿，代表本身重視家庭樂，喜歡與家人樂聚天倫，相學中主晚運享通，兒孫滿堂，夫妻白頭到老。所以大家揀老婆，咪以為靚就最好，要揀就揀個賢妻良母嚟做老婆！