幸福小女人的世界

39週7日

2010/02/07 19:17:36

仲有三日就到左預產期, 上星期三去檢查, 小魔怪重左好多, 依家大約有3.5kg (7磅幾)... 醫生話佢依家係good size baby, 不過如果過左預產期再唔出世, 就怕再重d我會好難自己生! 近呢幾日開始明顯感覺到個肚墜落左, 個胃無咁頂! (但胃口唔算好好) 而且同書所講既好吻合, 分泌多左, 腰骨痛, 多左假宮縮, 尿頻等... 但係, 生得既特徵就仲未出現依家我每次去廁所都會留意有冇出血/穿羊水唔知真係到左呢一刻, 我會點? 好緊張定好興奮呢??? 近呢個星期我不斷訓, 個人唔知點解好攰, 咩都唔想做, 連我最鐘意出去週圍食都唔想去, 可能個肚真係好重, 而且行耐少少都覺得好吃力, 寧願留係屋企! 之前出街出得多, 日日都四圍走, 依家行唔郁, 成日留守屋企發毛, 個人有d '呆呆地', 覺得超級悶啊!!! 所以, 聽日我想再出動一次, 好想臨生前去JW再high 返個tea, 咁就算係完滿啦, 哈! 之前我同過小魔怪講, 你唔好咁快出黎, 媽咪有好多地方想去食好野仲未去, 你等我食埋先好出世啊! 唔通佢真係咁聽話, 諗住完成晒我既心願先出世?!

三十八週

2010/02/01 18:00:36

仲有九日就到預產期... 依家暫時無乜動靜, 醫生話小魔怪個頭未入子宮頸, 未有跡象生得. 依家每日既感覺仍然.............. 一舊雲咁, 無乜特別, 不過都有少少又驚又喜! 驚既係 --- 驚自己無奶俾bb食; 又驚自己高估左自己, 到時湊唔掂唔知會點?!! 最令我唔捨得既係, 要放棄原有既自由自在生活, 好怕自己適應唔到! 不過呢d都無得驚, 都係講下姐, 我乜都交晒俾神, 每日都祈禱, 我信神會保守一切順利平安! 喜既係 --- 等左十個月, 真係等到頸都長. 大少每日都問小b, 你幾時出黎啊??? 真係好想親自抱住佢, 錫佢, 見下佢個樣. 因為睇4D相都睇得唔太清, 只係覺得佢個鼻超大! 最近既我除左返團契/崇拜/上初信班外, 其餘時間就係周街行, 每日至少行兩三個鐘, 趁未生去行多D街, 食多d 好野, 務求當做運動 & 同老公拍下拖, 享受埋最後呢段二人世界. 自懷孕四個月後到九個月, 其實我既生理變化不大 (感恩... ) 不過臨生呢幾星期, 生活習慣變左少少, 好多時朝早七八點起身去完廁所就訓唔返. 跟住會起身食個早餐, 睇下電視, 十二點又會眼訓, 再去午睡; 直到下午兩三點先再起身食tea. 而且偶然會有少少腳腫, 但又唔算好腫, 第二日又會消返! 朋友話佢家姐既經驗係三腫三消就會生得, 但我都腫左幾次, 不過每次都唔太明顯(除左第一次真係發現腫左既時候明顯地變左隻豬蹄), 跟住又無... 我諗呢個說法又係因人而異. 不過朋友又教我臨生前要坐多d'矮凳仔', 佢話好多人效法過都話會易生好多. 選擇自然分娩既我, 當然會跟住試, 免得到時後悔啦! 最近好多親戚朋友都會打電話問我 : 點啊? 生左未?? 有動靜想生未啊? 緊唔緊張啊?? 我都好施施然答: 無動靜啊! 可能今晚啦.... 唔緊張, 到時先算啦! 哈, 我都唔知自己呢份"大無畏精神" 係值得嘉許定係我太過淡定?! 我都唔知, 不過諗起將來有左小朋友, 應該大把野煩, 所以呢刻我盡量乜都唔想煩, 唔想諗, 煮到埋黎先食啦! 最近收到有d都係就生得既準媽媽留言, 大家都係到準備等生, 感覺好得意, 求主保守各位準媽媽都能夠順順利利, 平平安安咁生個健康BB啦... 阿們!

吃喝玩樂@九龍城

2010/01/28 20:57:27

自大少返黎後, 我地日常既生活除左準備BB野外, 就係不斷飲飲食食... 因為大少話難得佢依家唔洗返工可以日日倍住我, 加上我又未生, 仲行得食得, 要趁呢D時間好好享受二人世界, 食勻港九新界!!!!!!! 前兩日令我特別興奮既係去左好耐無去既"九龍城"食食食. 平時成日睇食評, 好食既地方好多時都推滿人, 又要Book 位, 又要排隊先食到! 難得依家我地天天都是星期天, 仲唔趁呢D時間去試個夠咩 ~ 第一站: 人氣蛋糕店 --- Patisserie Tony Wong 因為驚太遲去買會斷貨, 所以第一站先去呢到揀晒想試既蛋糕, 可以轉頭先黎取餅, 咁就唔洗攞住D餅周圍走! 睇Openrice & 聽朋友講得多佢點巴閉, 排晒長龍, 賣到斷晒款...但價錢又唔平喎, etc... 前兩日就趁weekday無乜人時下午去朝聖下, 果然真係唔洗排隊 (不過店內都有客, 等落order都等左十五分鐘) Total 揀左六件啱我口味既蛋糕, 果然件件都好精緻... (每件平均38/件) 極力推介 : Chocolate Truffle Mousse Cake, 朱古力本身唔太甜, 而且慕絲部份做得超超超超滑, 我原本都唔算係朱古力迷, 但食完佢呢六件蛋糕, 佢係我至愛選擇! 第二至愛 : 士多啤梨拿破崙, 拿破崙係我平時極之喜愛既蛋糕, 基本上夠脆, 吉士夠rich 我就會好鐘意... 正! 另外呢件係 - 綠茶Opera, 係Daddy至愛, 皆因味道唔甜, 啱老人家口味.. 而且佢既朱古力真係做得好出色, 好滑... 綠茶味都好重, 比起食其他一般味既蛋糕, 份外清新! (呢d CAKES 作為當日晚飯後既甜品, 大家都食得好開心!!!!) ********************************************************************************** 下一站 ---- 清真牛肉館 (我地既 Lunch) 當然一定要試既"牛肉餅" 超多汁... 第一次食, 唔記得係勁多汁, 一咬落去'唧'到成枱都係汁, 好彩無整到件衫! 後尾見到隔離枱又係有人食呢個餅, 又係'唧'到D汁周圍係... 雖然好狼狽, 但睇得出大家都食得好開心! 仲有叫左個 "清真拼盤".. 個青瓜海淅好好食, 其他都唔錯! 咖喱羊腩飯 ---- 個咖喱好好味, 雖然對我黎講辣左少少, 但都忍唔到要食, 因為咖喱好香, d 羊腩又炆到好淋... 超正! ********************************************************************************* 去九龍城我其實主要目標係Tony Wong, 另一個係金滿堂... 金滿堂既甜品真係好好食, 最衰香港區無分店, 攪到我好難得先食到 >_<, 所以幾飽都要食啊!!!! 十大銷售甜品 --- 但願某年某月某日可以同一大班朋友黎一次過試晒佢! 一定好壯觀~ 榴槤飄香 --- 無法抗拒, 每次想試第二款, 但最後都係唔捨得放棄佢! 超正爆~ 大少既金枝玉葉 (揚枝金露) --- 我鐘意食呢間既揚枝金露, 因為佢既汁係杰杰地, 用芒果打出黎, 唔係水'撩撩'個隻, 好濃芒果味!!!! 你地睇我食得幾滿足!!!!!!! 哈哈哈~ 依家既小魔怪已經有37週, 我地都ready預備佢隨時出世.. 不過聽醫生講佢個頭仲未入子宮頸, 應該未咁快出世住! 希望小魔怪乖乖地, 好好同我地合作啦, 因為大少同我都希望佢可以係新年前/初三後先出世, 最好唔好踏正紅日個幾日啦!!! (不過都會將一切俾交神, 求神帶領~) 提外話 : 依家有左部iphone真係好方便 (當然要配合埋無限上網個plan), 去到邊都要可即時上網睇新聞, 睇股市, 睇地圖, 上網搵餐廳, 睇食評, 搵戲院資料, 巴士路線, upload facebook等.. 真係一部電話在手, 世界通行! 勁啊~) 吃喝玩樂真係好開心, 但做人要謹記無論係開心或患難既日子裡都要記念神, 要懂得感恩神所賜既一切! 將榮耀交俾神, 阿門 ~

Happy B-day to me!

2010/01/06 00:00:54

2010年既生日同以往好唔同係我........ ~ 婚後第一年過既生日... ~ 肚裏感覺到小魔怪不停踢住我一齊過 ... ~ 最後一年咁自由自在可以四圍去, 想訓就訓既生日 (因為阿B出世後應該唔會再咁自由!) ~ 心裏充滿聖靈, 感覺份安平安, 再一次跟隨主而過既生日 ~ 媽咪離開左我第一年過既生日 ~ 大少同我以後都唔洗再去中東, 終於可以返黎同家人朋友團聚! 以上每一樣都令我好感恩...... 感謝主保守左我29年, 係我三十歲前搵返做人既目標, 唔洗再係呢個世上浮浮沈沈, 不知悔改! 感謝媽咪29年前辛苦生我出黎; 雖然媽咪已離開我, 但我知主會代我照顧媽媽感謝老豆養育之恩, 感謝大少一直既愛戴同包容, 感謝神賜一位新生命俾我地感謝"我們這一家"各成員既互相扶持, 感謝所有朋友既愛戴及鼓勵, 感謝為我做栽培既E小姐, 等等等等數之不盡!!!!!! 生日賣大包... 多謝晒大家... 希望以後每日我都會一樣咁開心, 咁平安, 緊隨上帝! "所以我告訴你們, 不要為生命憂慮, 喫什麼, 喝什麼, 為身體憂慮穿什麼, 生命不勝於飲食麼, 身體不勝於衣裳麼。你們看那天上的飛鳥, 也不種, 也不收, 也不積蓄在倉裡, 你們的天父尚且養活他, 你們不比飛鳥貴重得多麼。" (馬太福意6:25-26)

感恩的聖誔

2009/12/28 21:54:29

今年既聖誔係我記憶中過得最開心既一年... 09年對我黎講發生左好多好多事, 有開心有唔開心! 但好感恩, 雖然我係呢個'世上'失去左我最親愛既媽咪, 但係呢件事上面亦令我有好多得著... 當中最重要既係我又一次回到神既懷抱, 有聖靈既生命, 好似又重新一次復活咁, 心靈上好滿足, 好感恩! 有呢種改變信相係每一個基督徒最重視&最感恩既經歷... 真的, 現在既我真係好開心, 好想身邊家人及朋友快快信主... 嘻嘻! 由12月22號做冬開始, 日日都好充實.. 最開心係24號晚同家人晚飯後, daddy & 表弟願意跟我返教會既怖道會聽道, 當中大家仲要好enjoy, 過左一個好開心, 好感恩既平安夜... (感謝主!!) 到正日聖誔節25號, 就約左一班best friends上我屋企攪 X'mas Party, 自媽咪出事後, 大家好耐無聚一聚啦.. I miss u all 人生得一知己死而無憾... 雖然我朋友唔多, 但可以話大部份都係知己, 我真係好幸福呢!! To all my best friends, I love u all soooo much~ 今年聖誔身懷六甲既我, 大條道理唔洗落廚, 哈! 辛苦晒我地既大廚CookieYanYan, 佢一手包辦晒, 焗肉醬義粉, 咖喱雞, 炒椰菜, 牛油粟米, 忌廉粟米湯, 仲有Special order既新鮮牛柳, 就咁煎都已經好好味... 欣, 我地真係好欣賞你既廚藝架!! 你好叻呢~ 呢位就係我地好叻既大廚--- COOKING MAMA (YAN YAN) 啊.. 大家有冇發現我剪左短髮, 咁大個女第一次剪咁短小魔怪已經有八個多月大啦!! 過多三日大少就返黎, 我地可以一家團聚... 依家d相機真係越出越新, 外型靚之餘, 仲要有自拍功能(前面有個細畫面俾你睇住影), 有美肌功能, 又有Lomo功能, 仲有soft 鏡功能, 一定影到靚,,, 哈! 攪到我心思思都想買過部新啊~ 聖誔扒地當然唔少得交換禮物... 今年用畫鬼腳方法抽獎.. 好好笑!! 大家都好緊張自己會抽到D乜呢?????? 呢位幸運兒抽到我份禮物,, 係牛乳足腳皮MASK, 我諗應該啱所有人用... 哈哈哈! 嗚... 我都唔知係好彩定唔好彩, 抽到一箱出前一丁啊!!!! anyway, 識到你地呢班好朋友真係好感恩, 希望年年有今日, 大家係新一年都繼續開開心心, 健健康康, 早日信主啊!!!!

聖誔前夕遊迪迪尼

2009/12/20 18:00:40

早前約左家姐, 烏G, 阿茄 & 菇菇姐一齊去迪迪尼玩.. 第一次聖誕去迪迪尼, 好有聖誔氣氛啊!!!!!!! 我地下午先施施然入去, 當日都唔少人, 不過拖住我呢個大肚婆, 好多機動遊戲都無玩, 主要都係影相同shopping~ 最鐘意迪迪尼就係呢d 美國大街既小屋, 間間都好別緻, 怖置得好warm,, 加埋聖誔裝飾, 真係令人感覺好似去左童話世界! 聖誔節當然會有聖誔主題, 有悉心打扮既工作人員帶住薑餅人, 糖果士的出黎同小朋友影相, 相信不久既將來, 我都帶住小魔怪黎玩... 由於大家都未食lunch, 所以一入到去就醫肚先!! 家姐極力推介呢間 "Corner Cafe", 佢話係咁多間餐廳最好味喎! 聖誔套餐已經ready, 價錢合理, 而且味道真係"不錯吃", 最欣賞佢既南瓜湯, 好好味 ~ 食飽後就到花車巡遊時間, 雖然都睇過好多次, 但每次睇都會開心, 會忍唔住同卡通人物揮動, 大叫佢地個名.. 哈!!!!!! 再黎都係去下小小世界, 睇3D, 玩巴司光年,, 估唔到呠呠車佢地唔俾我玩 >_< 好hea咁玩完就繼續影相.... 勁多人睇既Golden Mickeys, 好鐘意入面扮泰山既大隻佬, 真係好MAN,, hahaha 百看不厭轉眼間就天黑, 美國大街都開始噴雪, 增添聖誔氣氛.. 啦啦聲係未放煙花時罷個靚位影下個城堡, 好靚呢~ 餘下時間就係我既血拼時間, 一心諗住買d BB野俾小魔怪, 但佢地今期既BB野麻麻地, 最後都係買俾自己 & 家人.... 感恩個日天色唔太好, 但不冷又不熱, 又無落雨, 我地玩得好開心呢~ 相信下次再去迪迪尼個感覺已經會有好大分別, 今次應該係我玩得最遊閒既最後一次!!!!

小小分享

2009/12/06 18:14:03

就是你們的頭髮也都被數過了, 不要懼怕, 你們比許多麻雀還貴重。(路加福音12章7節) *********************************************************************** 不知不覺, 小魔怪已經有31週 (七個多月) 回想最初剛知道自己有左既時候, 除左頭三四個月肉體上好辛苦外, 其餘最大既感覺就係..... 嘩, 有排先等到你出世,, 可唔可以快D出世啊?! 轉眼間, 仲有兩個月就係你既預產期, 心情開始有少少唔同左依家既我依然好期待你快d 出黎, 但總會補多一句 : 你要足月先好出世, 唔好早產, 早產b聽講好難湊, 唔好要媽咪擔心啊! 最近家中發生太多太多事.. 我回顧返自己好似由有左到依家都無真真正正咁休息過頭三四個月, 不停嘔, 反胃, 不適, 得返半條人命! 去到四個月穩定d就開始要攪結婚既事, 之後就係搵屋搬, 再之後就係睇傢俬, 為新屋準備五個月開始係我既honeymoon, 行得食得訓得, 身體負荷亦唔大... 慶幸一早plan結婚月份係九月, 亦係我最佳狀態之時! 攪完一輪以為可以安安樂樂咁養胎, 誰不知天意弄人, 唔到一個月就知道媽媽生病了! 懷孕期間遇到呢d事, 我實在受唔住... 以前細個讀書時已決志信主, 但好耐都無團契/返教會.. 但好感恩, 係呢段難過既時刻, 神再一次呼召我, 而我自己都感覺到好需要神. 係媽咪病塌中我要負責買餸, 煮飯, 照顧佢 (當然, daddy都好勞碌, 負責帶佢到處檢查求醫), 係個段日子真係幾辛苦, 無論身或心都好攰, 唔想接受呢d事發身係自己身上, 但仍然要去面對. 對住bb, 我都要同你講聲對唔住, 係呢段時間媽咪應該好開心咁俾d正面訊息你, 令你生長得開心, 安穩, 但好多時我都忍唔住會傷心, 會流淚, 會失控! 好多人都話大肚婆唔好去醫院, 唔好四圍走, 唔好去d唔乾淨地方... 如果換著以前既我, 我都會咁同"大肚婆"講, 但當自己家人有事既時候, 我真係無辦法因為我係"大肚婆" 而推去唔理媽咪.. 呢次真係一個好好既經歷, 神俾左好大信心我, 我知道就算要我返大陸, 去醫院, 甚至係留係醫院同媽咪過夜照顧佢, 我都無太大擔憂會影響bb, 因為我確信, 神一定會保守我地, bb同我一定會平安健康! 直到bb剛滿七個月後一天, 媽媽離開左我地.... 但感恩既係我仍然有體力去為媽媽辦身後事, 希望媽媽能夠安息! 隨著媽媽既離逝, 我既重任彷彿告一段落.... 我唔知將來仲會有咩艱難既路要行, 係某一刻, 人既情緒真係會失控, 會頂唔住. 但藉著靠住主耶穌, 我相信凡事都會係美好, 都係神所成就的. 大少係呢段時間都俾左好多力量我, 無左佢, 可能我都未咁快可以復原, 再一次感謝神賜俾我既一切一切... 我相信唔係所有人都好似我咁幸運可以遇到神, 或者感受到神既愛. 畢竟信仰唔係三言兩語就可以令一個人即時信服, 但我真係好想身邊未信既家人或朋友都會試下接受, 好想神有機會撒下聖靈既種子係未信既朋友身上. 因為唯有依靠神, 人既生命先有意義!

最佳時刻

2009/12/03 11:34:42

媽媽最後都敵不過病魔, 在上星期三離開了我們. 傷心, 難過, 不捨, 自責, 後悔, 害怕, 痛心, 不願接受等百感交集的心情通通都感受到一直以來以為自己同媽媽的關係不及爸爸親厚, 如果有一天失去她, 應該也不會怎樣, 很傻地以為只要有爸爸及大少, 其他都不重要. 直到在媽媽患病中看見她所受的痛苦, 體力一日比一日差, 甚至最後連說話也無力時, 我才發現, 媽媽在我心中原來也是很重要, 不可缺少的感謝主, 在我最無助, 最傷心, 最自責之時不停安排身邊有不同的天使來安慰我, 甚至用神的話語親自來告訴我應該怎樣去面對一切. 這幾天, 家人或朋友都很擔心我, 畢竟我腹中有小生命, 大家都怕我會受不住打擊, 會影響BB. 傷心難過一定少不免, 但再一次感恩的是神每天都安撫著我, 令我心情很快便能回復平靜, 慢慢去接受現事; 雖然偶然回想起媽媽臨走時的痛苦表情, 我的心仍然心如刀割, 自責是否做錯決定讓她去大陸醫治?! 但慈愛既神一直都細心照料我, 每當我有這些想法時, 神會即時給我話語, 叫我不要這樣想. 直到昨天, 夜欄人靜時我又一次想起媽媽, 突然疑惑媽媽這次的不幸是真的"不幸"或是人為疏忽呢? 說實在, 對於大陸的醫療, 我並沒有百份百信心, 所以我不時都會想自己是否做錯決定, 是否害了媽媽? 這些問題都令我很困擾.. 曾經有一位教友安慰我說, 不論是否安排失誤, 但只要你們心裡知道當時大家決定此安排都是因為有愛, 已經足夠! 無錯, 我們當初採取此決定都是相信會成功, 才排除一切送媽媽上去醫治的. 可能在某些人心中會認為我和爸爸做錯決定, 但這是神和我們一家人所做的決定, 一切都是為媽媽好而做, 並不是草草了事. 十二月三日, 神又再一次告訴我不要再為媽媽的去逝而自責或讚牛角尖詩篇: 116:15 「在耶和華眼中, 看聖民之死極為寶貴。」時間到了。不是出於我們任何人的選擇, 是上帝所預定的時刻。我們也一起接受了它。這是最合適的時刻, 因為上帝永不誤時。衪知道媽媽已完成她的工作, 且影響力及典範仍將常存。母親回天家過聖誕節; 時間已到, 在上帝的帶領中。我亦會好好照顧自己, 不負神對我的恩慈; 我相信神是無比仁慈的, 衪必會代我好好照顧媽媽, 將來我們必能在天國相聚。

愁苦有益

2009/11/11 11:51:23

經文 : 傳道書 7: 1-6 金句 : [往遭喪的家去, 強如往宴樂的家去; 因為死是眾人的結局, 活人也必將這事放在心上。憂愁強如喜笑; 因為面帶愁容, 終必使心喜樂。] 傳道書的智者指出往服喪之家比宴樂還好, 因為愁苦可以使我們接觸到生命必然的結局 -- 死亡, 使我們對自己仍然能活著有所珍惜。生命的短暫及對親人的傷痛懷念, 使我們領會到人與人相知相惜的寶貴。哈哈大笑像放煙花般, 燦爛一閃便消逝無蹤, 傷感的淚水卻像流水般在心長流, 可以洗滌心靈。一個次次考試成績名列前茅的學生, 不易明白功課有困難的同學; 相反, 一個經歷過不合格、學業上受過挫敗的學生卻體驗到無能和愁苦的煎熬, 當他日後成績進步, 便會較易有一份謙和, 對人多有一份體諒。因此, 愁苦令人多生一份柔和, 與其他軟弱的人相連, 看事物亦有深一層的觸覺。 *************************************************************************** 好感恩最近家中雖然發生唔開心既事, 但神仍然讓我感到平安, 時時保守我地一家, 當我每次失望無助時, 神都一直安撫著我, 不斷向我彰顯神既大愛, 甚至為我們一家作好準備. 今天早上收到報告後, 心情很傷心, 當開始軟弱既時候, 我拿起"從靈開始", 揭去十一月十一日(即今日) 既文章看看, 神又一次眷顧我, 藉著書本來作安慰. 無錯, 如果人一生都活在喜樂, 無風無雨, 好容易會忘記"幸福並不是必然" ; 相反, 當人面對生命無助, 甚至死亡, 才會發現仍然能活著已經是天大既福氣。睇完呢章經文及解說, 我心情釋放好多, 心靈又一次獲得平安! 神既因典真係太美麗~

幫幫忙

2009/11/06 21:20:54

好耐無update個blog, 見到大家既留言, 實在窩心. 最近家人身體不適, 起初心情都好差好難平伏但藉著不斷禱告, 讀經, 老公, 家人及主內姊妹既支持, 依家心情真係平安好多但黎緊既日子, 我相信唔會有太多時間update個blog, 請大家唔好見怪! ************************************************************************ 另外我想問下大家有冇聽過一種另類療法叫做"自然療法" - 王永漢教授呢種自然療法係發源於美國/加拿大, 據王教授話好多一般西醫醫唔到既病, 用自然療法係可以醫治 (e.g. cancer) 其實我地只係想聽多D別人既案例或經驗, 睇下呢種療法係真定係假... 我自己上網search 過但資料唔多.....所以想睇睇各位, 有冇人聽過呢樣野! 自於係咪真係可以醫得返好, 我相信都無人可以講"一定得", 但有希望既都想一試. 唔該晒~ ********************************************************************************** 好感恩.... 我地一家人一直都好懷疑呢個治療法, 周圍搵資料都搵唔到好實在既見證. 藉著禱告, 不斷既禱告, 放心交俾神, 原來真係有應許... 神係聽到架! 呢個係一個好實實在在既見證.. 依家真係有一個自己朋友家人試過, 而且佢提供左好多好詳盡, 好寶貴既資料, 令我地一家對呢個治療信心大增! 雖然最後結果無話一定寫包單會無事, 但總算知道唔係呃人, 唔係騙局先... 真係好感恩!!!!!!!! 好多謝呢段時間不斷為我地禱告既朋友..... 你地對我黎講好重要~