豬流感?

豬流感肆虐全球，呢度已經進入流感高峰，真係一唔小心就lai野。

先生上星期開始休假兩週，好好彩又唔好彩，第一個星期全部都用晒黎幫手湊仔，因為兩個細路輪流病。

上周六爸爸第一日放假，哥哥天未光就醒咗，瞓唔著，自已一個出廳坐，等我瞓醒幫佢著衫，點解咁熱？發高燒喎，佢喊晒口話好唔舒服，肚痛，坐多陣仲嘔添．．．打去醫務所問可唔可以去睇，點知個receptionist叫我地帶佢去醫院，無計啦，都要去。

好彩果日唔算多人，兩個幾鐘就搞掂，因為只係初期發病，醫生都唔可斷定係咩流感，叫我地返屋企觀察。

就係咁，哥哥連續食咗四日退燒藥先完全退燒，但周二細佬終於淪陷，又發燒喇!
本來周三BOOK咗打flu shot，點知變咗去睇醫生。醫生話豬流感癥狀係發高燒，骨痛，有ｄ會肚屙。哥哥都中晒，係無屙，不過嘔。醫生懷疑佢係輕微豬流感，因為細佬細，醫生就開咗特敏福，呢度醫生從來唔開藥比細路，今次真係例外。但係咁細個就食特敏福得唔得架？經過考慮，都係唔比佢食住，都好感恩，細佬發咗兩日燒就好返，可能佢身體比哥哥好，所以好得快。

好彩我地無咩planning，無打算放假外遊，如果唔係就唔知點算，唔通日日响酒店瞓咩!