網誌分類：我與肥仔的生活記載 |
今次呢個病係從07年12月開始發覺,當時見到肥仔每次出到外面玩,小便時都帶血,但响屋企時係完全正常,全無問題!睇醫生時結論係,因為佢出到去玩時太過興奮,開心,又喜歡霸地盤,到處小便,而且可能太用力小便,所以痾損咗,''何B仔''前端!
到剛過去既6月,當時發覺肥仔小便時有異樣,尿液反光,出街小便帶血情況仍依舊,再睇獸醫,當時醫生結論係前列腺發炎,要食消炎藥,抗生素!
6月28日食完所有藥後,到昨日7月1日第一次外出,去明珠間舖沖涼,鏟毛!落車後在行去路程中,今次肥仔既小便,已經唔係之前既帶血,而係全鮮紅色既血尿,當時我已經想到要馬上令肥仔冷靜,响路邊停止咗10分鐘,因為只要佢靜下來,相信情況會好轉,但做唔到,一直去明珠salon路途上,及到達之後,每次小便都係鮮紅色既血尿!同之前一樣,當回到家中又完完全全正常,毫無異樣!!!
到今晚7月2日,再睇另一位獸醫,今次結果又係咁,睇唔出肥仔有咩問題,暫時可以試用一個方法,醫生開咗D鎮靜劑俾肥仔,要每次外出之前2-3小時服用,如果情況依舊,就要照X光片,再決定尋方案去醫治,如果有改善,咁可能會每次出去玩時,都要長期食藥!
其實我都唔知可以做D咩,點解每次肥仔有病,我都好似咩都做唔到,每次醫生回覆都係唔敢做手術,唔敢用藥!抽筋,後腳,絕育,依家仲加多樣血尿!我情願有位醫生可以同我講,呢個病可以斷尾,但你要俾3,5,7萬手術費,到時你理我乞,借,當,到好啦,起碼有結果嘛!!!!!!!
88 002.JPG
15-6-08 LETS DOG CAF...
15-6-08 LETS DOG CAF...
miyukiapple 2008-07-05 16:33
cherry 2008-07-05 00:13
肥仔2008-07-05 00:59
cherry 2008-07-05 00:04
肥仔2008-07-05 00:59
但我肥仔一見到有陌生人仕，就一定會好興奮，開心！會坐唔定僕去撩人玩架！上過嚟我屋企既朋友就見識過啦！！
所以如要照X-RAY 時，已預料佢一定唔會乖乖就範囉！因為我之前都照過啦，係照唔到囉！！
bebe小公主 2008-07-04 20:31
肥仔2008-07-04 23:28
肥仔响屋企係完全正常，毫無問題架！
但出到街，就出事啦！
明珠 (bear bear媽咪) 2008-07-04 16:00
而且唔知肥仔咩事,但唔代表絕症,你要保持樂觀,支持肥仔啊,我都支持你地!!!!
肥仔2008-07-04 23:28
我無事喎，唔駛擔心！
依家就係唔知肥仔咩事，但前後都睇咗３位醫生，全部都話佢無大問題喎！
但妳當日都見到，肥仔既情況及轉變啦！
我都唔識講，聽日睇完醫生再諗！！！
cherry 2008-07-04 12:34
肥仔2008-07-04 23:28
６月２１當日ＹＶＯＮＮＥ帶我同肥仔去睇嗰位醫生，又係問妳同一問題，佢話絕育＂可能＂會對肥仔有小小幫助，但當我講出，肥仔由細開始有遺傳抽筋病時，位獸醫馬上面色一沉！
呢幾年大小病痛所睇過既醫生，每一位聽到肥仔有遺傳性抽筋，都唔敢用麻醉藥，所以肥仔只係絕育呢個簡單既手術，都無獸醫敢做，因為用太適量既麻醉藥份量，怕佢過程中突然之間會抽筋，咁既情況會好危險，如果加強麻醉藥，又怕佢會唔識醒！
不論依家，將來咩問題都好，如果突然有醫生同我講，佢會肯幫肥仔做手術，我一定會好慎重考慮囉！
多謝妳為肥仔祈禱，而我亦會記住之前，每次見到妳時，妳都會為我地準備既心意禮物！
miyukiapple 2008-07-03 23:50
哎呀~~點解會咁家??我都覺得要睇多一兩個醫生好d~~無理由一興奮就咁嚴重家??不如下次再有咁既情況用相機影低/錄低去比醫生睇，等佢知道有幾鮮紅色。其實有時睇醫生，醫生都係靠你講過情況而去診斷，所以影低，比醫生睇好過自己講多多聲。第二個醫生話要開鎮靜劑係因為佢都覺得肥仔太興奮而導致，定係你同醫生講過之前個醫生係咁診斷呀??我建議無論點都好，x-ray照叫佢做，反正x-ray都係幾百蚊，早d睇過早d睇下有無事，咪仲安心。
肥仔2008-07-04 23:27
已經約定聽日下午，再睇另一位獸醫！當時我只想快Ｄ令肥仔停下冷靜，所以無想過要影相，下次會啦！
醫生診斷後覺得肥仔無問題，所以開鎮靜劑，希望佢出街時能控制情緒，當時我肯定，我仲未講之前醫生既診斷結果！
Ｘ－ＲＡＹ因為要麻醉，所以好多醫生唔敢幫肥仔做！而呢位醫生亦認為暫時無病徵睇出肥仔要去照Ｘ－ＲＡＹ既理由！
^.^ 綿花糖 ‧ 糯米糍 ^.^ 2008-07-03 13:06
肥仔2008-07-03 22:34
我會再睇多個醫生,如果又係咁模稜兩可既結論!
我會即刻照X光,再尋意見!
妳有無好介紹? THX!!
安咪咪 2008-07-03 12:02
肥仔2008-07-03 22:34
扁扁二家姐 2008-07-03 09:40
肥仔2008-07-03 22:34
昨晚諗咗成晚,我都係咁話,究竟係咪真係要去到食鎮靜劑呀!
我唔想咁囉!!!
bebe小公主 2008-07-03 09:04
肥仔2008-07-03 22:34
我無嘢喎,呻兩句啫!我唔冷靜去面對,無人幫到肥仔架!!
我會再睇多個醫生,再聽多D意見!!
天空海闊 Wild at Heart 2008-07-03 01:31
真係好擔心肥仔,如果中醫係呢方面既療法會唔會好啲?聽講而家小動物都睇中醫調理身體既。
肥仔2008-07-03 22:34
多謝關心,唔知點解我對動物中醫師,總係有D唔相信及唔放心!
但睇人架中醫,我又覺得OK喎,我自己感冒時,都有睇中醫架!
真矛盾!!!
小狗為食B 2008-07-03 01:18
但係冇理由一緊張就會嚴重成咁???
另外,路人甲講得啱,成日食任何藥都唔好,而家佢已經因為抽搐要長期成某一啲藥,如果連出街之前都要某D藥梗不好,寧願去少D街。
肥仔2008-07-03 22:34
我都好想知,點解肥仔開心,興奮時就咁樣?
好大機會,我唔會俾肥仔食呢種藥!
一切等ni睇多個醫生之後,再作決定!!!
HHuman路人甲 2008-07-03 00:51
如果係咁,你唯有CALL人上門幫肥仔扮靚靚、如果要比佢呼吸新鮮空氣同曬到太陽,最遠都只可以帶佢去你住既建築物既天台。
因為,食鎮8劑係會出現藥物依賴架,只會愈來愈要食得多,所以,唯有盡量減少佢食呢啲藥既次數,除非好大件事如睇醫生,一定要出街咁至食。
我以前其中一隻西施狗有心臟病,行雷時好驚及心跳加速.....正正就係要在將會落雨之前便先要拍個啲丸,點知後來愈食愈冇效、要愈來愈加大劑量,因為長期食某一種藥既關係,影響了佢既肝腎功能。
肥仔2008-07-03 22:34
同意,我就係怕肥仔會愈食愈多,所以依家仲考慮緊,應否俾佢食!
我會再睇多個醫生,再聽取意見!
我唔想肥仔呢一生,再無得出去玩!!