冬眠

唉 ~ 呢個11月工作極忙 , OT時間勁多 !
公司D嘢 , 好似做極都做唔完...............
私人時間越嚟越少.........

呢個禮拜天氣轉凍 , 位皇帝開始冬眠 , 每晚都唔願郁 ,
除咗開飯 ,去廁所 , 其餘時間都趴响床仔 !
瞓到D毛亂哂 , 瞓醒時成個生意失敗LOOK咁 !
有晚已經著住件厚衫 , 瞓响床仔時見佢身體微微咁震 ,
見到咁 , 即刻落去7仔買暖包 ,
然後再用毛巾包住 , 放入床仔底下 , 咁樣至無震咋 !
可能年紀開始大喇 , 上年都覺肥仔越嚟越怕凍 ,
仲記得之前冬天甚少時間要著衫 , 而且有床都唔會瞓 .......
10度仲响屋企周圍走 ,
回想時間的確走得好快 ! 

肥仔上年D厚衫唔太岩身 , 薄衫都仲可以 ,
所以今年要買過喇 !
有晚去九龍灣食飯 , 順便行去牛頭角下邨小販檔睇睇 ,
雖然D款式唔太鍾意 , 不過天氣咁凍 ,
點都要買返兩件頂住先 !
有時間行過其它地區再留意吓囉 !

返到屋企同位皇帝玩試衫 ,
出奇地 ~ 無黑面又無變機械狗喎 ,
著完仲勁嗲 , 係咁响旁邊挨身挨勢 ,
嗲人摸 , 嗲人錫.....
想行後兩步影相都唔得 , 跟到實痴實腳邊 !
呢個冬天 , 多謝 Jenny 送俾肥仔既新床仔 !

天氣凍喇 , 各位主人及狗狗要注意身體 , 唔好冷病呀 !

肥仔冬眠LOOK

呢兩幅 ~ 係我準備瞓之前偷影架                       

今年減咗肥 ~ 都仲係著18碼                                  

岩岩瞓醒 , 個樣仲係呆呆吓                               

林二汶 ~ 星星 , 月亮 , 太陽