不吐不快

琴日18:38 我開始打呢篇entry，之後我打o左幾句之後，就放"存為草稿"，打算唔出呢篇entry，因為個topic，係呢度講好似有少少inappropriate。到夜晚我覺得好唔甘心好嬲，所以最後我決定都係打埋落去。

多日唔見人，一返o黎就寫咁樣o既題目，真係唔多好，仲要今日係中秋節，一個開開心心o既節日。

我俾人有意地碰到我唔想被碰到o既地方。

琴日下午，我經過一條好多人o既路，一個中年男人迎面而來撞向我o既左邊，佢隻手有意無意o地摸到我，因為我o既右邊係我媽咪，而佢隔離都有人，避無可避之下，只係縮o左一縮，但佢都掂到我大腿內側，咁你o地大概都諗到佢原本係想掂到邊到啦。當時我轉身大力一扯呢個男人背後o既背囊，好大聲「喂 ！」佢轉頭我就再講：「你頭先摸我邊度！」　佢答：「我唔小心即！唔好意思。」　我反問o左句「唔小心？」我就放o左呢個中年男人。

最後我無報警，有人可能覺得，有無攪錯？！你唔報警？？因為我個人覺得，警察係用o黎維持治安，為o左呢Ｄ事而報警我個人覺得有點浪費警力。唔知道警察會唔會咁諗呢？但即使唔報警，我無可能會俾你就咁走o左去，呢Ｄ人要當住成街面前羞辱下佢，俾全街Ｄ人知道呢個人係咸濕佬。

我曾經聽過有些男人話：「俾人摸，你o地自己都有責任，邊個叫你著到咁少布？」我亦都好想係度問下有呢種想法o既男人：金行好多金，你唔去搶？停車場好多車，你唔去偷？　而且琴日我穿著好唔性感，雞翼袖背心＋長牛仔褲，都唔知點解會遇到呢Ｄ死變態佬。

打呢篇entry，係希望各位sister，遇到呢Ｄ死變態佬一定要俾Ｄ顏色佢睇。