9月30日 – 鯉魚門海鮮宴慶Tovey & Emily

放工後返左娘家hea，到差唔多夠鐘就出去觀塘，點知個個都要遲d先到，唯有在apm周圍睇下野。在log on見到切香蕉同携帶香蕉出街的用具，究竟有無人會買?

跟住就行去港鐵join佢地，在某店門外有包保鮮紙裝住些啡色的物體(有d似我整心太軟的材料)，門外就有五、六個軍裝在行來行去，聽tovey講那包物體無故在店內拋出地上。最搞笑係有個警察行過時竟然踩到那包野，雖然那些唔似C，但都算係証物。

人齊後我地就撘車走，kam叫我地同司機講”食海鮮那裏落”，我地都覺得好”火羅”，大家都唔想講! 仲令我諗起之前聽過的”魚蛋粉事件”

話說這個笑話係之前在forum睇到的:

有個人在撘小巴，一路諗住落車後食乜好，到差唔多要落車時，佢就大聲同司機講”魚蛋粉丫唔該”

頓時成車人大笑，之後那人就好瘀皮，急急腳落車，臨尾經過司機位時，那司機仲好抵死地問: 洗唔洗走青呀?

後來因為MEI去過，只係話巴士站有落就攪掂!

我們的第一道菜係龍蝦刺身，其實我第一次食，超新鮮，超正!

豉汁蒸蟶子 – 好味，又大隻!

一魚兩食，幾有鑊氣，好好味，但份量太多。

龍蝦伊麵 – 味道唔夠，有點失望。

辣酒煮花螺 – 幾惹味!

椒鹽賴尿蝦 – 超大隻，啖啖肉，仲好好味!

仲有果盤，超飽，但竟然仲食得落鎔鎔既卑鄙月餅，好好味!

Kam的uncle竟然話唔收我地錢就走左，實在太好人，但這餐都唔平，我地自己大概估價夾返錢，如果唔收錢我地下次都唔敢再黎。

食完之後，我地周圍影下相，突然奇想要扮千手觀音，竟然做返讀書時代的白癡野。後來在圖書館門前無聊地玩一輪，本來諗住這裏無人會見到，但到臨走那刻才發現門口有個閉路電視，oh…..我們的行為會唔會被上傳到you cheap?

最後去了kam屋企玩，Mavis老點我地上錯車，變左送佢返屋企，在車上竟然見到我呀哥，反而在屋企十年都唔會見一次。

在kam屋企玩猜猜畫畫玩到4點幾，raymond那幅貓圖實在太爆笑，點睇都係豬或者雞，完全無可能係”波斯貓”

第二朝一齊睇國慶巡禮，之後一齊去飲茶，飲完茶我地去黃大仙廟度行下，真係好耐無入過去，現在地方闊落左好多。佢地求完簽後，就去maggie hea左一陣先返屋企。