冇乜心情上街去!!

今日美國放假, 但一返來, 就比班仆街係琴晚整左單勁野, 一睇mail, 心知, 又賴野!!

比廠煩左半個上午, 發覺自己好抗拒出面轟人, 雖則廠係抵比人轟, 但我都比較唔想咁樣罵人, 自己心知咁樣做係比較難係呢一行發展, 唯有慢慢改la!!

下午有廠請飲茶, 萬個唔想去都要去..........

食飽後, 下午返來, 都係少少忙, 點知到臨放工前, 比阿姐一提, 先知原來今日單獲, 原來係我有份出錯, 心情即刻黑晒, 唉............ 我都唔知可以點, 客又放假, 冇回覆, 呢幾日都要愁住愁住咁過日子, 星期一搞得掂還好, 如果星期一搞唔掂, 就真係...... 唉!!

放工後, 同豬又出左旺角, 好耐都冇試過7點幾就係旺角行街, 但心情都因為公司既野而有所唔開心, 行街都行得唔盡情..............

係信和, 買左兩隻碟, 一隻係"衛蘭"隻新碟, 另一隻係老牌耆英歌手譚校長既精選碟, 埋單岩岩200元正 woo!! 破財!!

買完後, 同豬去左食扒, 食飽後, 本來諗住唔再食甜品, 但去到雅蘭, 比發記阿叔張"西米糕"優惠卷吸左入發記, 咁又食左3個甜品, 仲要係兩條友, 真係飽到嘔!!

食飽後, 慢慢行埋未行完既街, 行左3間levis, 但都買唔到心儀去annual 既褲 (不過其實3間所賣既野都係一樣, 但我都行晒3間.....), 咁就決定返歸算la!!!

返到屋企, 即刻將d歌放入ipod, 我竟然唔係先聽衛蘭, 走左去聽耆英歌手先, 佢d歌舊還舊, 但真係好鬼死正ar!!!