秋意中的心痛

終於天氣開始涼喇, 朝早起身都係廿幾度, 晏少少出太陽就熱d, 但係夜晚又涼, 所以早晚都係著多件外套穩陣d 尋晚同翹翹沖完涼, 著返條長褲仔先, 因為翹翹兩父子都係"熱狗", 唔駛蓋被之餘仲可以瞓到成身汗, "小熱狗"更加青出於藍, 起身個頭仔可以濕哂架 偏偏翹翹媽係怕冷之人, 真係"弱不禁風", 要蓋被蓋到實 

同翹翹著返套睡衣仔瞓覺, 就算翹翹唔蓋被仔都唔怕凍親

下晝去左葵芳行街, 竟然遇見姑婆同表e, 自從新年後見過面到而家, 真係好耐無見喇. 但係翹翹好怕陌生, 雖然肯叫人, 但係要翹翹媽抱住囉 今日都係想行吓, 但係原來最大收穫既又係翹翹....... 不過翹翹今日好naughty, 去到舖頭手多多周圍搞.....見到零食想要就自己拎.....一係就扯住翹翹媽要行去糖舖夾糖糖 好惡呀. 真係激到翹翹媽紥紥跳. 不過當翹翹爸帶左佢出商場, 話要掉佢去垃圾桶, 佢又走返黎攬住, 但係又唔肯道歉認錯.....大家糾纏左好耐, 直至翹翹媽响商場入面同翹翹byebye, 翹翹先肯認錯 睇黎, 翹翹驚翹翹媽唔要佢, 多過怕翹翹爸掉左佢囉 基本上行咁耐翹翹就唔合作咁耐, 直至臨走佢先伏响翹翹媽膊頭nap左, 係扭計扭到攰定係真係夠鐘nap, who knows搞到翹翹媽今日下晝都無心機同翹翹影相添

返到屋企影返先得, 其實今日一家三口係著同一個色tone既衫出街, 大家都係blue t-shirt襯牛仔褲, 難得翹翹又肯著牛仔褲添....

今晚都係出街食飯, 初初翹翹都好乖自己食麵, 但係食到一半就唔食....都由佢嘞, 可能因為落街前飲左支奶, 飽飽地. 跟住又黎naughty, 俾菜菜佢食, 放左入口咬左幾啖, 就lur落地, 第一次睇得唔清楚, 以為佢唔小心. 第二次先發覺原來佢係故意既, 仲要係笑住咁lur, 翹翹媽都即刻襟住佢個口, 點知救得條菜黎, 翹翹唔甘心就掉筷子落地. (霹靂啪~~火都出黎既聲音) 翹翹媽都唔知點解當時會咁做, 即刻二話不說就抱左翹翹出餐廳門口, 跟住閂埋門等佢响出面自己冷靜吓, 自己返入去同翹翹爸食野. 真係好嬲, 因為今日由朝早起身開始, 翹翹就一直响度曳, 唔合作.  被罰左出門口既翹翹就响門口行黎行去, 望下爸爸媽媽, 又蹲吓咁....翹翹爸問左佢兩次知錯嗎, 佢都唔道歉.....

翹翹响出面企左十幾分鐘, 仲大膽到周圍行, 係反方向咁行, 翹翹爸即刻跟出去. 到餐廳差唔多關門要拉閘, 翹翹見到翹翹媽仲响入面先至扁咀喊, 翹翹爸由另一邊門帶佢返入黎道歉. 翹翹媽要翹翹講佢自己有咩做錯? 佢識話"唔好掉筷子落地", 仲有呢? 翹翹唔記得左, 要提佢下次唔可以lur食物落地, 天父所賜既食物, 有d小朋友無得食, 佢有得食都要lur, 真係好曳. 若果下次再係咁, 會點樣? 翹翹話"要企門門度"......  翹翹媽好唔開心, 唔想原諒佢, 但係翹翹係自己個仔, 都要原諒佢.

心痛的晚上~~

今晚婆婆打黎話可以湊翹翹, 同翹翹爸商量後決定帶翹翹返去婆婆度. 翹翹知道返婆婆屋企條路, 佢就話要"返屋屋, 唔返婆婆度". 由入lift開始就喊, 喊到未打開lift門, ee都話聽到. 不過, 今晚無情講, 翹翹太曳, 成日恰翹翹媽, 話"下次唔敢", "下次唔曳"...翹翹媽無心機到同佢講"等你下次唔曳先返屋屋啦". 翹翹係咁攬實翹翹媽喊, 真係喊得好悽涼, 喊到對眼仔紅哂, 眼淚係咁流 翹翹媽都好sad, 但係都係唔好心軟, 要俾d教訓佢. 當ee攬實翹翹後, 翹翹爸同翹翹媽就走. 翹翹好快就追出黎, 蹲响鐡門度望, 响度喊, 話要返媽媽屋屋, 喊到喘左氣, 講野都斷斷續續咁又想開門, 當然開唔到啦, 跟住我地入左lift都聽到翹翹既喊聲

行返屋企段路, 同翹翹爸傾返, 究竟咁做係啱定錯呢? 翹翹爸話, 咁樣做好似會令到翹翹有心理陰影, 爸爸媽媽唔要佢 呢個一定會, 但係掉返轉頭睇, 呢個亦都係俾翹翹既教訓. 當佢曳曳時, 爸爸媽媽唔帶佢返屋企, 要乖先可以返. 其實又好似唔係好啱咁......翹翹咁細個, 咁做會對翹翹有咩影響呢? 唉~~真係唔知呀 

10:15 返到屋企, 打俾婆婆, 翹翹仲喊緊~~喊左15分鐘

10:30 再打俾婆婆, 仍然喊緊, 俾翹翹聽電話, 佢淨係响度嗌

11:25 又打俾婆婆, 翹翹沖完涼飲緊奶, 應該想瞓, 大約喊左一個鐘

其實知道翹翹喊左半個鐘嗰陣, 翹翹媽好想過婆婆度接返佢, 攬吓佢, 但係咁做仲弊, 完全反效果. 翹翹媽今晚好心痛, 痛到瞓唔著. 見到翹翹唔聽話~心痛, 唔聽教~心痛, 喊到好可憐~心痛, 喊左一個鐘~心痛. 真係好心痛呀

ee打黎同翹翹媽講, 翹翹响屋企喊, 要著返對鞋仔話返媽媽屋屋. 著完鞋仔要開門, 開唔到門就搵婆婆幫佢開. 開左門俾佢, 翹翹真係夠膽行出去想襟lift, 雖然夠高但係唔夠力襟掣 (好彩婆婆住既屋苑啱啱換左lift掣, 好難襟) 連婆婆都話佢野蠻左好多, 話要咁就咁, 所以要留翹翹响屋企多d接受"家訓"喎 雖然知道翹翹而家係反叛期, 但係而家既翹翹真係有d令翹翹媽"心力交瘁", 之前既翹翹好聽話, 點解而家叫極都唔聽? 之前既好習慣, 點解而家一下子就好似忘記哂咁? 翹翹媽好想有人可以解答, 邊個可以答呀?