老頭子冤家路窄

尋日星期六, 11點幾瞓醒同閒生食完嘢就去福田針灸, 5點幾就趕返屋企沖涼換衫去飲老同學個細佬個仔既滿月酒。

老同學個老公都係我同學, 我哋一班老友同學一齊坐, 坐我對面有一個70幾歲既男人帶住2個細路, 以為主人家親友搭枱的, 當老同學個亞媽對同學講: ( 幫我招呼妳老爺喇!) 我即刻丁一聲, 原來你係我老同學個老公個老豆, 心想乜你仲未咩既咩, 你倆仔爺廿幾年前都玩得我透喇。老同學個老公都係我老同學, 但我都無比面佢同佢老豆打招呼, 加上佢都無介紹, 點解我咁憎呢條友呢..............

讀中三四時,  平時都係一班同學去玩, 但有次因為我同佢個仔都無嘢做, 佢話上去佢屋企, 上到去叫咗一聲佢家姐, 我就只係攞住罐藍罐曲奇食同睇電視, 睇睇吓, 佢個仔係另一邊同佢家姐傾到喊晒, 淨係聽到佢家姐話老豆有血壓高唔好拍拖激佢, 嗄! 我連手都未拖過, 2個人都無單獨去過街, 第1次去佢屋企咋喎, 乜我同佢咁就拍拖拿, 有無搞錯呀, 同學嚟咋喎!

第2日同學同我講話老豆叫佢唔好同我拍拖, 大家同姓唔好, 跟住最令我難過既就係佢老豆話我鼻樑高會黑夫 , 家姐話老豆血壓高, 唔好同我拍拖等.....。 我即刻問乜你老豆見過我咩? 佢話佢見過我哋一班人一齊影既相。 咪係囉, 一班人嘛, 點拍拖呀? 當時真係激到出煙, 激同學單純到低能, 激佢老豆咁講嘢 , 知到係同學自作多情, 但又唔想hurt佢, 加上佢老豆都反對, 算數, 我食晒隻死猫佢。 我同同學講, 係呀, 你老豆血壓高要聽佢話呀, 唔好激佢唔好拍拖呀! 佢就話我哋唔拍拖, 我會當妳係我個妹咁, 我會好似妳亞哥咁, 有咩事我會幫妳架 (心想粵語殘片咩 )跟住我就同個女同學(即e家佢老婆)講呢件事, 我話我唔鍾意佢個仔咋, 如果唔係佢一定爆血管死 , 我真係好嬲佢老豆當時用咁刻薄既說話去形容只有15,6歲既女仔, 而佢個忠直仔就唔識得理人感受講翻出嚟 , 所以我就憎到佢老豆入骨。

之後大家同學一起成長, 經歷很多悲歡離合, 最後老同學因為拍拖散咗, 都係好事, 因為佢男友真係唔係咁好, 我見老頭子個仔真係好好仔嚟, 就問老同學想唔想同佢拍拖, 又問忠直仔想唔想同老同學拍拖, 結果e家結咗婚都10幾年, 比我和閒生還要早結緍,個仔e家都10歲喇, 生活美滿  

要我晒咁長篇去講你, 可想而知你幾乞我憎

勾起不快的回憶錄後又回到熱鬧的酒席

雖然與佢同枱坐, 我都當佢透明, 無影響我哋一班人開心飲酒, 戲肉就係老同學個亞媽同d細佬嚟玩灌酒, 淨係叫, 飲!飲!飲!飲!飲! 倒酒比人, 我哋又學佢大叫飲!飲!飲!飲!飲! 跟住攞走隻杯 。我發覺我哋處於弱勢因為酒在別人手 , 再落去好唔掂因為閒生都比佢哋灌唔少, 於是我就大叫, 喂 ! 你猛叫人飲, 你隻杯呢? 於是我攞起枝酒叫翻佢哋飲, 同學好少見我玩灌酒, 都大叫亞閒發威喇  , 班衰嘢即刻攞走隻杯, 我話唔飲係咪咁唔比面先, 跟住同學細佬都無符, 我就順勢倒多d, 佢話夠夠夠, 乜倒咁多呀, 我就話年紀大手震嘛 , 跟住再倒比二細佬, 佢話閒姐, 隻手要定d喎, 唔好手震喎, 啋你都傻, 你哋唔飲咪我哋飲, 結果11點半都未離開酒樓, 返到屋企成12點幾lu  , 不過我和閒生閒仔都好開心。