留院生活（三）

Aug 22, 2008（星期五）

今日好忙、不過好開心、因為岡田Junior 可以推上房呀～

今朝護士巡房時話今日下晝 3：00 pm 要去授乳室上營養、沐浴指導 & 出院講座、（嘩、足足聽咗成個鐘！）跟住直接 4：00 pm 餵岡田Junior 飲奶、之後又話要到地下門診部俾醫生消毒傷口（其實日日都要消毒、但日日時間唔同）、真係好充實。就喺我餵完奶諗住到門診部時、有位護士忽然問我想唔想推 BB 車上房。（吓？！得咩？咁梗係想啦、求之不得呀！！！）原來正常啲 BB 喺第二日已經可以推上房、但岡田Junior 因為太細、要悉心照顧、等佢身體狀況穩定啲先可以推上房、因為始終推嚟推去、出出入入啲冷氣地方、怕凍親佢嘛～

聽完護士講解要注意嘅地方 & 洗完傷口後、即刻去認領岡田Junior 推上房！嘩、真係勁開心 & 興奮！終於有返我同岡田Junior 嘅私人空間啦、而且岡田君 & 岡田奶奶嚟探我時、都可以抱岡田Junior 。於是即刻 Send Mail 通知佢哋、叫佢哋今晚早啲收工、7：00 pm 前嚟醫院、如果唔係就 Meet 唔到岡田Junior 架啦。好彩佢哋最終都 Meet 到、但岡田奶奶就喺最後一刻先嚟到、所以淨係對到岡田Junior 一陣、相都無影就要推返落授乳室餵奶！不過唔緊要、聽日早啲啦、而聽日係星期六、岡田君放假可以下晝就嚟、可以對耐啲岡田Junior 、諗起都開心、快啲到聽日啦～

另外、今日護士教我嘗試餵人奶、雖然我仲未上奶（有啲担心）、但只係啜幾分鐘作練習。第一次喺咁多人面前洹胸露臂、實在有啲怕醜、但眼見個個新米媽咪都係咁、咁我又怕咩啫、況且個個都只係專注餵自己個 BB、跟本無人會得閒望你、於是就豁出去啦～第一次同岡田Junior 有咁近距離接觸、感覺好 Warm 好温暖、佢個咀仔好細、啜得好斯文好可愛～但可惜因為我未上奶、岡田Junior 基本上係啜緊空氣、不過唔緊要啦、咪當練習囉、加油、加油～

戴咗帽仔嘅岡田Junior 真係好可愛～

醫院幫岡田Junior 影嘅相、手掌腳掌印、出世時嘅錄音 & 臍帶（盒仔）

營養講座後嘅禮物～

仲有呢本書都係送嘅～

是日早餐

午餐

晚餐