學 拋波 day 2 (一又三分之二round)

拋波話難咩其實又晤係好難,但係就真係好攞咩,琴日玩咗個半鐘,因為水皮既關係,幾秒鐘就要彎腰執次波,結果琴晚兩條腿同條腰已經好酸痛。今朝起身仲係好痛,但係當下再玩既時候發覺,玩玩吓又晤記得咗痛,但係之後就... ...

但係今日無琴日既情況咁慘烈,因為已經識用身體去就個波,晤會時時都望住個波跌落地,琴日第一次,個人好似打功夫咁扎行個馬,郁都晤識郁。

今日發覺原來個波拋高啲會好掌握啲,因為準備時間多咗,咁就有信心响左手接波之前右手拋咗另一個波先,但係拋波既力度仲未控制得好好,時大時細,仲因為屋企樓底晤高,個波拋得太高打中天花,時時個波都會好大力咁彈返落黎,今日食咗好多波餅,中個頭還好,頭瞉頂夠硬,因為中面就好痛,尤其係面頰嗰舊骨,講講吓依家都覺得有啲痛。... ...

晤單只加度有問題,拋既方向都好有問題,時時拋到第三個波,右手拋嗰波去右邊... ...左手點接?!...一晤係就將佢拋咗去前面,有幾次仲差啲飛咗佢出街,結果要做好個封窗準備。呢兩日好熱呀,窗又晤開得大,我呢啲妹仔命又晤識嘆冷氣,吹幾吹又覺得寒,結果... ...。

今日已經可以拋到一又三分之二個round啦,只要個波高度同力度拋得好,就會放擔再出手拋,睇黎晤駛一頭半個月就會有啲睇頭喇。咁到時我就可以轉第二樣玩扯鈴... ...話時話,澳門邊度有扯鈴賣???!!!