兒童樂園 ~ 羅冠樵的藝術世界

好想去沙田文化博物館睇展覽, 開幕咗好多年, 我都係第一次去, 原來有好多嘢睇架喎, 今次除咗去睇粵語流行曲展覽, 都好想去睇 [兒童樂園] 展覽.

細個飲茶嗰陣, 阿爸都會俾錢我買漫畫睇, 多數都係老夫子或者係叮噹嗰啲, 到大個咗差唔多十歲, 有自己嘅零用錢, 就自己會去報攤買漫畫, 曾經都鍾意一啲粗俗啲嘅玉郎漫畫, 但係我記得我都曾經有自己買過 [兒童樂園], 印象中都好似係大約五蚊一本.

兒童樂園喺1953年創刊, 右上角嗰本就係創刊號.

哩啲就係作者 (羅冠樵先生) 平時畫畫嘅工具.

老鷹抓小鷄, 即係麻鷹捉雞仔啦 !

跳橡筋繩同埋跳飛機, 啲畫刻劃咗童年嘅玩意, 亦都好有中國畫味道.

展覽有好多手稿, 對比返手稿同真正出版嘅漫畫.

同時, 羅冠樵先生亦都有好多其他形形色色嘅作品, 畫功的確一流.

場地佈置亦都好有懷舊同兒童氣氛, 今日有好多學生嚟參觀, 載滿咗一啲歡笑玩樂聲.

[假西瓜] ~ 好有趣嘅故事.

雖然我唔係好記得當中嘅故事, 但係睇到都覺得好溫馨.

十二生肖作品, 仲有側邊嘅一啲題句.

睇起嚟好似好簡單嘅掃描, 但係當中都好有特色, 當中亦包括最新 2007年嘅作品.

隨後睇咗一個十六分鐘嘅影片片段, 哩位就係兒童樂園作者兼總編輯: 羅冠樵先生. 睇咗咁多畫, 睇埋哩啲片段, 女朋友同我都覺得佢好犀利呀 ! 佢哩個造型, 真係好似 [港版 手塚治蟲], 睇返佢嘅經歷, 真係有啲佩服佢, 而且已經九十歲, 都仲有喺 2007年有作畫.

突然間, 保安職業話羅先生嚟咗, 突然間真係覺得好興奮, 佢係同一啲記者一齊嚟, 喺佢自己嘅展覽場地, 影返一啲相, 做咗少少好簡單嘅訪問, 問佢點樣可以咁有童心, 畫嘅漫畫公仔同內容, 都咁神似, 而佢就大約係話, 要留意身邊嘅事物, 一直要保持哩種心境等等.

其實我真係有衝動, 好想上前同佢握手, 同佢講: [我細個都有睇兒童樂園架 ! 你好犀利呀 !]

雖然我都好鍾意手塚治蟲, 有去過佢喺大阪嘅博物館, 但係突然間, 我覺得羅冠樵先生, 佢嘅毅力同唔同嘅畫畫風格, 而且仲帶有中國同香港嘅色彩,  佢嘅功力或貢獻應該有過之而無不及呀.

羅冠樵先生逗留咗大約十分鐘, 影咗兩輪相, 簡單答咗啲問題就離開嘞 ! 雖然佢嘅聽覺可能唔係咁好, 但係個人仲好精神, 揸住把遮都行得好快, 希望佢身體健康, 繼續畫畫啦 !