大尾篤水壩 10km

早幾日跟 [健跑社] 練跑之後, 出去攞號碼布晶片紀念 T-恤.

繼十月一日喺大尾篤領跑之後, 重陽節又再跑嘞 !  

http://hk.myblog.yahoo.com/duckduck-day/article?mid=5316&prev=5388&next=5287

今次係 6:45am 喺太子有車接送, 比起上次喺九龍塘方便啲.

搭尾班通霄巴士, 瞓瞓吓就出到旺角囉.  

喺旺角食早餐, 睇到 [茶煲世家] 舊劇, 有李司棋毛舜筠黎耀祥哩幾個而家紅咗嘅藝員.

食咗早餐都係差唔多六點半啱啱天光, 如果唔係咁早, 好難得會見到旺角太子會咁少人.

集合地點係運動場道 (Playing Field Road), 見到警署外面有個 10km/h 嘅牌, 而家見到哩個 10km 長度, 個人就會好敏感睇吓乜嘢, 不過希望自己跑步盡量唔好 10km/h 咁慢啦 !  

有旅遊巴坐, 要入大埔大尾篤都係好快, 大約半個鐘多啲就到.

去到就已經有陽光, 唔算多雲, 唔似得上次跑咗大半都係陰天咁爽.

燒烤場地好混亂好多垃圾, 郊遊燒烤野餐啲人, 點解唔注重吓公德心 ?  

每次嚟到哩度, 見到啲艇仔, 都會諗返起以前同女朋友喺度爬艇仔.

哩度咁多年嚟, 爬艇仔嘅海面, 都係咁靚, 仲好溫馨浪漫添.  

今日打算要爭取好成績, 都係要早啲上去準備, 同埋霸返個靚位起跑.

上一次嚟都冇留意, 哩度有間青年旅舍, 外面仲有一大幅好靚嘅馬賽克 !

上到嚟水壩, 的確係有啲曬 !

路線同上次有少少唔同, 上次係 2km + 2km + 3km + 3km.

今次大約係 2.5km x4, 即係話唔駛跑得咁入, 唔駛上得咁斜.

本來睇吓啲雲會唔會遮住太陽, 但係結果喺水壩全程都係曬住跑.

不過, 我今日有帶太陽眼鏡, 仲可以有歌聽.  

起初跑頭幾公里, 覺得對腳有啲攰.

見到有啲 [細路] 跑喺我前面, 但係我就忍住忍住唔可以太心急.

今日全程都冇里數牌, 唯有自己睇住吓啲路牌標記, 大約摸索吓啲時間.

喺水壩對岸, 過第一個晶片計時地毯, 係 12:00.

第一次返到折返點, 係 25:20.

第二次過對岸晶片計時地毯, 係 39:25.

最後返到水壩直路, 要開始加速大步啲, 期間以為可以做到好啲嘅成績.

但係跑極都未到, 好彩仲有力頂埋佢.

(最後聽嘅三首歌係: 極速 第二世 活著 viva.)

最後衝線都可以 PB, 但係只係快過半年前約半分鐘.   52:27  

哩對就係最近嘅新跑鞋 NB, 感覺唔錯.

女朋友話佢顏色太 [青], 但係跑步哩啲, 浮誇啲都冇緊要.

啱啱星期三, 喺 [斧山] 練跑, 都係靠佢俾 BLOG 友認出咋.  

過終點後, 哩位 BLOG 友都有搵我, 佢今日嚟影相, 都有幫我影咗幾張. Thanks !  

最後自己休息吓, 出吓海風, 曬吓太陽, 感覺好舒暢.

搭咗兩程巴士, 又經過青馬大橋, 見到深井同馬灣, 之後返到東涌.

可能哩幾日太多賽事, [健跑社] 嘅就拉隊去廣州跑 Nike-10km, 星期六日都另有賽事, 所以今日重陽節唔算太多人, 都唔係見到好多熟悉嘅跑友.   (見到新朋友, 都唔錯.)

仲有係跑得最快嗰兩位, 唔係 [後生仔], 而係 M5 組嘅師兄, 犀利 !  

自己總算達標, PB 成功, 要跑到 sub-50, 真係一啲都唔容易, 唯有慢慢嚟, 等我 PB 多幾次先跑穿佢啦 !  

11月8日 (NB 15km) 11月15日 ('Nike' 10km) 11月29日 (Unicef HM)

仲諗緊好唔好報 12月6日 Mizuno 10km......